Имрӯз, 11-уми сентябр, дар як бинои баландошёнаи истиқоматӣ, воқеъ дар ноҳияи Синои дар шаҳри Душанбе сӯхтор сар задааст. Навори сӯхтор нахуст дар шабакаҳои иҷтимоӣ паҳн гардид, ки таваҷҷуҳи корбаронро ҷалб кард.
Аз Сарраёсати Хадамоти давлатии оташнишонии ВКД ба “Азия-Плюс” гуфтанд, ки сӯхтор соати 12:37 дар бинои баланошёна воқеъ дар кӯчаи Раҳмон Набиеви ноҳияи Синои пойтахт рух додааст.
Ба иттилои манбаъ, сӯхтор дар пешайвони ошёнаи ҳафтуми бинои истиқоматӣ, тахминан масоҳати 10 метри мураббаъро фаро гирифтааст.
Аз ин ниҳод гуфтанд, ки кормандони оташнишонӣ нахуст сокинони биноро аз минтақаи оташгирифта наҷот дода, сипас сӯхторро хомӯш кардаанд.
“Сӯхтор бо истифодаи 5 адад нақлиёти оташнишонӣ то соати 13:32 дақиқа ба пуррагӣ хомӯш карда шуд. Сабаб ва зарари ҳодисаи сӯхтор аз ҷониби мутахассисони соҳа муайян карда мешавад. Дар натиҷаи сӯхтор ягон нафар осеб надидааст”,-гуфтанд аз ин ниҳод.
Дар навори сӯхтор, ки нахуст дар шабакаҳои иҷтимоӣ паҳн шуд, дида мешавад, ки як ошёнаи бинои баландошёна оташ гирифта, шуълаҳои он ба дигар ошёнаҳо низ мерасад.
Бояд гуфт, ки оташ гирифтани биноҳои истиқоматӣ дар шаҳри Душанбе солҳои ахир зиёд иттифоқ меафтад, ки мақомот аксаран сабаби онро расиши ноқил ё аз беэҳтиётии худи сокинон унвон медиҳанд.
Аз ҷумла, шоми 8-уми апрели соли ҷорӣ дар яке аз биноҳои 12-ошёнаи кӯчаи ба номи Шарифҷон Ҳусейнзодаи ноҳияи Шоҳмансур сӯхтор сар зад. Он замон ду корманди қаҳвахонаи “Ланджоу”, ки дар ошёнаи якуми ин бино ҷойгир аст, то омадани кормандони сӯхторхомӯшкунӣ сокинонро аз коми оташ наҷот доданд.
