Дар пайи ҳамлаи як гург ба хонаи як сокини деҳаи Басмандаи ноҳияи Деваштич модар ва фарзанди 7-солаи ӯ захмӣ ва чанд рӯз дар беморхона бистарӣ шудаанд. Дар як моҳи охир, ин сеюмин ҳамлаи гург ба сокинон ва чорвои онҳо дар ин ноҳия аст.
Бибираҷаби Мирзошариф, сокини 32-солаи ин деҳа ба “Азия-Плюс” гуфт, рӯзи 9-декабр дар рӯи ҳавлиаш як гург ба фарзандаш Муҳаммадҷон Почоеви 7-сола ҳамла кард. Вақте ӯ ба кӯмакаш шитофт, гург ба ӯ низ дарафтод.
“Додзанон буромадам, ки дар назди дарвоза гургбачае писарамро хуншор карда истодааст. Писарамро халос карданӣ шудам, ки гургбача дасту китфони худамро газидаву харошида захмӣ кард. Садои моро шунида ҳамсояҳо омаданд ва гургбача тарафи куҳ гурехт”, – чунин нақл кард ыараёни ҳодисаро ин зан.
Бибираҷаби Мирзошариф баъди ин ҳодиса ҳамроҳи писараш 9 рӯз дар беморхона бистарӣ буд ва доруҳои заруриро гирифт.
Ба гуфтаи ӯ, писараш бештар аз пой ва пешонияш захм бардошта, худаш аз дасту китфонаш захм бардошт.
Зимнан, овозаи захмӣ шудани модару фарзанд миёни сокинони деҳа дар бораи ҳайвони ваҳшии ҳамлагар сару садоҳои зиёдро ба миён овард. Баъзеҳо мегӯянд, шағол ба онҳо ҳамла кардааст. Вале Бибираҷаби Мирзошариф мегӯяд, хонааш дар домани куҳ аст аст ва шағолро ҳамарӯза мебинанд, ҳатто ба ҳавлишон медарояд ва одатан он одамро бинад мегурезад:
“Ин даррандае, ки моро захмӣ кард аниқ гургбача аст”.
Ҳаётулло Ғафуров, раиси деҳаи Басманда дар суҳбат бо “Азия-Плюс” ҳодисаро тасдиқ кард ва гуфт, “хуб мешуд масъулони Хоҷагии ҷангал ба ин масъалаҳо таваҷҷуҳ кунанд”.
Дар як моҳи охир ин сеюмин ҳодисаи ҳамлаи гург ба сокинони деҳаи Басманда ва чорвои онҳо аст. Аз ҷумла, рӯзи 28-уми ноябр як гург ба ду чупон, ки сокини ҷамоати деҳоти Ваҳдати ноҳияи Деваштич буданд, ҳамла карда, онҳоро захмӣ кард.
Ҳодисаи дуюм, рӯзи 22-юми ноябр рух дод ва як гург беш аз 10 чорвои сокинони деҳаи Басмандаро кушта, чанд чорвои дигарро захмӣ карда буд.
Солҳои гузашта, махсусан дар фасли сармо ҳайвоноти ваҳшӣ, ба сокинони минтақҳои кӯҳии кишвар ва чорвои онҳо ҳамла карда, онҳоро захмӣ ва гоҳо ба ҳалокат расонида буданд.
