Сафорати Тоҷикистон дар Русия куштори навраси 10-солаи тоҷик дар як мактаби вилояти Маскавро таҳти назорати қатъӣ гирифта, дар робита ба ҳодисаи мазкур ба ВКХ-и Русия ёддошти расмӣ фиристодааст. Дар ин бора аз ВКХ-и Тоҷикистон ба "Азия-Плюс" хабар доданд.
Аз ин ниҳод расман тасдиқ карданд, ки навраси 10-солаи кушташуда Қобилҷон Алиев, шаҳрванди Тоҷикистон аст.
"Мавзӯи мазкур таҳти назорати қатъии Сафорати Тоҷикистон дар Русия қарор дорад. Ёддошти расмӣ ба Вазоркати корҳои хориҷии Русия ирсол шудааст. Сафорат бо модари марҳум ҷиҳати мусоидат дар тамоси доимӣ мебошад", – гуфтанд аз ВКХ-и Тоҷикистон.
Ин ниҳод ба наздикони навраси кушташудаи тоҷик ҳамдардӣ карда, изҳори умедворӣ кард, ки ҳодиса аз сӯи мақомоти марбутаи Русия одилона тафтиш мешавад ва гунаҳкор ҷазои сазовор мегирад.
Ҳодисаи ҳамлаи як наврас ба мактабе дар ноҳияи Одинсовои вилояти Маскав субҳи 16-уми декабр, тақрибан соати 9-и субҳ, рух додааст. Кумитаи тафтишоти Русия гуфтааст, ки ин ҳодиса дар шаҳраки Горки-2-и ноҳияи Одинсово рух дода, ҳамлагар як навраси 15-сола ва шаҳрванди Русия аст.
Ба навиштаи манбаъ, ин наврас ба муҳофиз ва як хонандаи 10-сола бо корд зарба задааст. Дар натиҷа хонандаи 10-сола аз ҷароҳати бардошта ҷон бохтааст. Аммо ин ниҳод дар бораи шахсияти кушташуда ва шаҳрвандии ӯ иттилоъ надодааст.
Дар навори воқеа, ки онро саҳифаи “Mash” нашр кард, дида мешавад, наврасе бо корд ба гурӯҳи хонандагон наздик шуда, мепурсад, “миллати шумо чист?". Муҳофиз кӯшиш мекунад, ки ӯро боздорад, аммо ҳамлавар ба рӯйи ӯ гази ашковар мепошад ва бо корд ҳуҷум мекунад. Пас аз ин, наврас дубора ба кӯдакон ҳамла карда, як писарбачаро захмӣ мекунад.
Саҳифаи “Телеграм”-и “112” иттилоъ додааст, ки модари хонандаи кушташуда дар ҳамин мактаб фаррош будааст.
Пас аз куштор, ноболиғи ҳамлавар дар яке аз синфхонаҳо худро маҳкам карда, дар ҳамон ҷо аз ҷониби нерӯҳои интизомӣ дастгир шудааст.
Радиои Озодӣ бо такя ба яке аз ҳамсоягони ин оила навишт, ки ин зан пас аз марги шавҳараш ду фарзандро ба танҳоӣ бузург мекард.
Бино ба гузориши хабаргузории ТАСС, навраси боздоштшуда ба гуноҳи худ иқрор шудааст. Алайҳи ӯ бо иттиҳоми куштор ва қасди куштор (моддаҳои 105 қисми 3, моддаи 30 қисми 2 Кодекси ҷиноии Русия) парвандаи ҷиноӣ боз гардидааст.
Ба қавли хабаргузории “РБК”, муфаттишон аз ҳамлагар нусхаи дастгоҳи тарканда пайдо карданд.
Расонаҳо менависанд, ки ҳамлагар дар заминаи ҳисси миллатгароӣ ва бадбинӣ ба мактаб ҳамла кардааст: ҳамлагар пеш аз ҳодиса “манифест”-и худро бо номи "Ғазаби ман", ки дар он ӯ зидди яҳудиён, мусалмонон, зиддифашистон ва либералҳо ҳарф мезад, ба ҳамсинфонаш фиристодааст.
Дар ҳамин ҳол, навраси гумонбар аввалин нишондоди худро ба тафтишот додааст. Дар ин бора нашрияи "Газета.ру" аз қавли Кумитаи тафтишотии Русия хабар дода, навиштааст, ки "навраси боздоштшуда эътироф кардааст, ки чанд вақти ахир барои содир кардани ин ҷиноят омодагӣ медид".
Ҷузъиёти бештар аз бозпурсии навраси боздоштшуда, ки дар синфи 9 таҳсил мекард, нашр нашудааст.
Бояд гуфт, ҳодисаҳои куштори бераҳмонаи муҳоҷирони тоҷик дар Русия кам нест. Соли 2022 Далер Бобиев, як кӯдаки 5-солаи тоҷик аз дасти парастори худ, ки шаҳрванди Русия буд, бо бераҳмии махсус кушта шуд ва ҷасадашро баъди ним сол аз дохили халтае дар ҷойи мошинҳо пайдо карданд.
Ҳамчунин, ҳодисаи таҷовуз ва қатли Ҳувайдо Тиллозодаи 5-сола вокуниши густурдае дар пай дошт. Ӯ рӯзи 22-юми июли соли 2018 аз майдончаи назди хонаашон дар шаҳри Серпухово нопадид шуда, як рӯз пас ҷасади ӯро дар борхалтаи варзишӣ пайдо карданд.
Пас аз панҷ оли мурофиаҳои додгоҳӣ, соли 2023 Александр Сёмин, як шаҳрванди Русия дар содир намудани ҷинояти вазнин – таҷовуз ва куштори бераҳмонаи шаҳрванди ноболиғи Тоҷикистон айбдор дониста шуда, ба ҳабси абад маҳкум шуд.
Бояд гуфт, куштори тоҷикон аз дасти шаҳрвандони Русия аксаран аз ҷониби мақомоти ин кишвар расонаӣ намешавад. Ин дар ҳолест, ки қонуншиканӣ ва ё ҷинояти шаҳрвандони Тоҷикистон ҳам аз ҷониби расонаҳо ва ҳам мақомоти Русия барҷаста ва густурда паҳн карда мешавад. Махсусан, баъди ҳодисаи “Крокус Сити” чунин равиш батадриҷ афзуда, фишор рӯйи муҳоҷирон ва қонунҳои муҳоҷират сангин шудааст.
