Мақомот алайҳи як марди 28-солаи сокини ноҳияи Айнӣ бо иттиҳоми ба худкуши расонидани занаш парвандаи ҷиноятӣ боз кардаанд. Гумонбар мунтазам шаъну шарафи ҳамсарашро паст зада, ӯро “ба фоҳишагӣ ва ҳамхобагӣ бо мардони бегона” айбдор мекардааст.
Вазорати корҳои дохилӣ (ВКД) бе зикри номи ҳарду ҷониб гуфтааст, ки гумонбар аз соли 2018 инҷониб “бо баҳонаи бо шахсони бегона муносибати маҳрамона дошта ва гӯё фоҳиша мебошад, дашномҳои кабеҳ медодааст”.
Ин ниҳод навиштааст, ки мард ахиран рӯзи 29-уми ноябри соли гузашта, “ҳамсари 26-солаашро дар хонаи зисташон мавриди латукӯб қарор додааст”.
“17-уми январи соли 2026, ҷабрдида тоқат карда натавониста бо мақсади худкушӣ бо корди хоҷагӣ як маротиба ба шикамаш зарба зада, суиқасди худкушӣ намуда, ҷароҳати ҷисмонӣ бардоштааст”, – омадааст дар хабари расмӣ.
Назари гумонбар ва ҳамсари ӯ дар робита ба ин қазия маълум нест. Мақомот дар хусуси вазъи саломатии зан ҳам иттилоъ надодаанд.
Мақомот алайҳи мард бо иттиҳоми “ба худкушӣ расондан” (моддаи 109, қисми 2-и КҶ) парвандаи ҷиноӣ боз кардаанд. Ин банди қонунгузорӣ аз панҷ то ҳашт соли зиндонро пешбинӣ мекунад.
Ҳодисаи латукӯбу куштори аз сӯйи шавҳаронашон дар пайи нофаҳмӣ дар Тоҷикистон бори аввал нест. Аз ҷумла, моҳи ноябри соли гузашта додгоҳи вилояти Хатлон Чорӣ Қулиев, як сокини ин вилоятро барои бо барқ куштани ҳамсараш ба 21 соли зиндон маҳкум кард. Ин ҳодиса рӯзи 20-уми августи соли 2025, дар пайи ҷанҷоли зану шавҳар бар сари баргузории тӯйи писарашон рух додааст.
Ҳамчунин, аввали моҳи январ мақомот як сокини 28-солаи деҳаи Ғеши ноҳияи Муъминободро бо гумони куштори ҳамсари собиқаш “дар заминаи хусумату рашк” дастгир карданд.
Дар Тоҷикистон омори алоҳидаи кушторм ё сӯиқасд ба куштори ҳамсарон аз дасти шавҳаронашон нест. Вале Бунафша Файзиддинзода, раиси Кумитаи занон ва оилаи Тоҷикистон дар нишасти матбуотии моҳи феврал соли гузашта гуфта буд, ки соли гузашта 3 ҳазору 246 ҷиноят нисбати занону духтарон содир шудааст.
Тибқи иттилои ВКД дар кишвар дар шаш моҳи соли 2025 – 28 ҳолати одамкушӣ ва сӯйиқасд ба ҷон сабт шудааст. Маълум нест, ки дар ин миён чандто куштори ҳамсарон аст.
