Бо гузашти беш аз 20 рӯз аз поёни муҳлати бақайдгирии рақамии нафақагирон (Face ID) дар Тоҷикистон ҳанӯз чеҳрашиносии электронии онҳо идома дорад. Дар Оҷонсии суғуртаи иҷтимоӣ ва нафақа дар ин бора расман шарҳ намедиҳанд, вале боздиди мо аз ҳаддиақал ду шуъбаи нафақа дар пойтахт маълум кард, ки бақайдгирии рақамии ин қишри ҷомеа то ҳол идома дорад.
Бақайдгирии маълумот ва чеҳраи нафақахӯрон (Face ID) нимаи дуюми моҳи ноябр оғоз шуд ва қарор буд то 30-уми декабри соли гузашта дар ҳама шаҳру ноҳияҳои кишвар ба анҷом расад.
Вале мушоҳидаи хабарнигори “Азия-Плюс”, рӯзи 20-уми январ дар ду шуъбаи нафақаи пойтахт нишон дод, ки то ҳол нафақагирон барои бақайдгирӣ ба шуъбаҳо меоянд. Баъзеи онҳое, ки аллакай аз қайди рақамӣ гузашта буданд, бори дуввум ба шуъбаҳо даъват шудаанд.
Як масъули шуъбаи нафақаи ноҳияи Шоҳмансур, ки нахост аз ӯ ном барем, сабаби дубора даъват шудани бархе аз нафақагиронро “бо сабабҳои техникӣ нагузаштани маълумот ва чеҳраи онҳо ба барнома” унвон кард.
Дар Раёсати суғуртаи иҷтимоӣ ва нафақаи шаҳри Душанбе ба мо гуфтанд, омори дақиқи нафақагирони бақайдгирифташуда дар пойтахт ҳоло маълум нест. Дар хусуси муҳлати анҷоми бақайдгирӣ низ мушаххас чизе нагуфтанд ва ишора карданд, ки “ин раванд аз ин пас доимӣ мешавад ва сокинон ҳангоми таъйини нафақа ҳатман аз аёнияткунонӣ мегузаранд”.
Дар Оҷонсии суғуртаи иҷтимоӣ ва нафақаи Тоҷикистон, ки ниҳоди масъули бақайдгирии нафақагирон аст, ба муроҷиатҳои пайвастаи “Азия-Плюс” дар хусуси омори нафақагирони бақайдгирифташуда посух надоданд. Танҳо дар суҳбати будини сабт рӯзи 15-уми январ тасдиқ карданд, ки “бақайдгирӣ ё шинохти чеҳраи нафақагирон аз ин пас доимӣ мешавад ва муҳлати бақайдгирии таъиншуда рӯзҳои наздик ба анҷом мерасад”.
Қаблан аз ин ниҳод ба “Азия-Плюс” гуфта буданд, ки то 11-уми декабри соли 2025 ҳудуди 40% нафақахӯрон аз бақайдгирии рақамӣ ё аёнияткунонии чеҳра гузаштаанд.
Бояд гуфт, тасмими бақайдгирӣ ё аёнияткунонии чеҳраи нафақагирон дар асоси супориши ҳукумати Тоҷикистон аз 31-уми октябри соли 2025 гирифта шуд. Дар асоси он, фармоиши роҳбари Оҷонсӣ аз 14-уми ноябри соли 2025 дар бораи таъсиси гурӯҳи корӣ имзо шудааст.
Бақайдгирии маълумот ва чеҳраи нафақахӯрон тариқи телефон сурат мегирад ва аксу иттилои онҳо дар барномаи алоҳида ҷой дода мешавад. Барои ин нафақахӯронро зарур аст, ки бо ҳуҷҷати тасдиқкунандаи худ ба шуъбаҳои Оҷонсии суғуртаи иҷтимоӣ ва нафақа муроҷиат кунанд.
Қаблан, аз ин ниҳод гуфта буданд, ки нафақагирон дар дилхоҳ шуъбаи ин ниҳод метавонанд худро ба қайд гиранд ва барои ин кор шарт нест, ки ҳатман ба маҳалли қайди доимӣ рафт. Ҳамчунин, нафақагироне, ки дар хориҷи кишвар қарор доранд, пас аз бозгашт метавонанд, аз қайд гузаранд. Нафақахӯрони пиронсол ва онҳое, ки маъюбият доранду ба шуъбаҳои нафақа омада наметавонанд, кормандони шуъбаҳо ба назди онҳо рафта, ба қайд мегиранд.
Оҷонсӣ ҳадафи барномаро “шаффофият ва самаранокии идоракунӣ" унвон карда афзуда буд, ки он дар тамоми 68 шаҳру ноҳияи кишвар анҷом дода мешавад.
Тибқи иттилои расмӣ, ба ҳолати 1-уми январи соли 2026 теъдоди нафақагирон дар кишвар 877 ҳазору 206 нафар аст. Ҳоло дар кишвар ҳаҷми нафақаи миёна, аз ҷумла, нафақаи суғуртавӣ ба 509 сомонӣ, нафақаи меҳнатӣ ба 641 сомонӣ ва нафақаи иҷтимоӣ ба 362 сомонӣ баробар аст.
Дар Telegram, Facebook ва Instagram бо мо бимонед.
