Муҳаммад Бобозода, сардори идораи замини шаҳри Исфара бо иттиҳоми гирифтани пора боздошт шудааст ва ҳоло нисбати ӯ тафтишот идома дорад.

Шарифҷон Ҷумъазода, раиси шаҳри Исфара рӯзи 2-юми феврал дар  нишасти хабарӣ аз вазифа сабукдӯш шудани Муҳаммад Бобозода, сардори идораи замини ин шаҳрро тасдиқ карда, гуфт, ки “ҳоло дар ин маврид як иттилоъ аст, ки ӯ бо иттиҳоми гирифтани пора дастгир шудааст”.

“Ҳоло тафтишоти пешакӣ  идома дорад. То хулосаи суд содир шудан, наметавон дақиқан дар ин бора чизе гуфт”, – изҳор дошт раиси шаҳри Исфара.

Аммо дар бораи ҳаҷми пора, аз кӣ гирифтани он ва аз сӯйи кадом ниҳод боздошт шудани он тафсилот надод.

ИЗОБРАЖЕНИЕ Шарифҷон Ҷумъазода

Як манбаи дигар аз ин ниҳод тасдиқ кард, ки Муҳаммад Бобозода айни ҳол дар боздоштгоҳ аст, аммо ӯ ҳам аз ироаи тафсилот худдорӣ кард.

Талошҳоли мо барои муайян кардани тафсилоти боздошти сардори идораи замини шаҳри Исфара аз ниҳодҳои тафтишотӣ бесамар анҷомид.

Ҳамчунин, назари худи муттаҳам ё пайвандони ӯ ҳам барои расонаҳо дастрас нест.

Ба гуфтаи раиси шаҳри Исфара, Муҳаммад Бобозода аз 6-уми январ аз вазифа озод шуда, ба ҷойи ӯ Маҳина Ҷӯраева иҷрокунандаи вазифаи сардори идораи замини Исфара таъин шудааст.

Бояд гуфт, боздошт ва муҷозоти масъулини идораҳои замин дар шаҳру навоҳии вилояти Суғд аз мушкили доғ боқӣ мемонад, ки ахиран раиси вилоят Раҷаб Аҳмадзода низ аз он нигаронӣ кард. Ӯ дар нишасти ахири матбуотии худ гуфт, ки давоми соли 2025 дастикам 64 ҳолати қонуншиканӣ дар бахши замин аз сӯйи ниҳодҳои дахлдори кишвар ошкор шудааст.

Аз ҷумла, тобистони соли 2025 Шокирҷон Қаробоев, сардори идораи замин дар ноҳияи Шаҳристон аз ҷониби мақомоти ҳифзи ҳуқуқ боздошт шуда буд ва барои ғайриқонунӣ додани қитъаи замин (моддаи 338 КҶҶТ) айбдор шуда, бо пардохти ҷарима, аз ҷавобгарӣ озод шуд.

Дар Telegram, Facebook ва Instagram бо мо бимонед.

Лоиҳаи “Аудиокитоб” бо Субҳон Ҷалилов ба хондани асари "Таърихи инқилоби Бухоро"-и Садриддин Айнӣ, Қаҳрамони Тоҷикистон оғоз кард. Дар нашри навбатӣ, қисми бисту якуми ин асари таърихиро манзури ҳаводорони китоб мешавад.

 Ҳадафи лоиҳаи “Аудиокитоб” бо Субҳон Ҷалилов сабти китобҳои савтӣ ва пешниҳоди он ба хонандаву шунавандааш тавассути радио, сомона ва саҳифаҳои худ дар шабакаҳои иҷтимоӣ ва ба ин васила тарғиби ҷомеа ба мутолиаи китоб мебошад.

Қаблан, лоиҳаи “Аудиокитоб” ҳикояҳо аз “Маснавии маънавӣ”-и Ҷалолиддини Балхӣ, “Дардҳои гиреҳхӯрда”-и Иноят Насриддин, ҳикояҳои Антон Чехов, романи “Киштии Нӯҳ” ва маҷмӯи ҳикояҳои Юнус Юсуфиро дар шакли савти манзури хонандагон ва шунавандагон карда буд.

Ин бор таҳиякунандагони лоиҳа ба хондани асари таърихии "Таърихи инқилоби Бухоро"-и Садриддин Айнӣ, Қаҳрамони Тоҷикистон оғоз карданд.

Китобҳои савтӣ ҳамарӯза тариқи радиои “Азия-Плюс” пахш мегардад ва ровии он Субҳон Ҷалилов, рӯзноманигор ва директори барномавии радиои “Азия-Плюс” аст.

Cабти китобҳои савтиро аз саҳифаи “Телеграм”-и бахши тоҷикии хабаргузорӣ метавонед гӯш кунед.

Дар Telegram, Facebook ва Instagram бо мо бимонед.

Теъдоди сайёҳоне, ки соли гузашта ба Тоҷикистон ташриф овардаанд, қариб 1,8 млн будааст. Дар ин бора Ҷамшед Ҷумъахонзода, раиси Кумитаи рушди сайёҳӣ, хабар дод.

“Соли 2025 ба Тоҷикистон 1 миллиону 784 ҳазору 454 сайёҳ омад, ки ин нисбат ба соли 2024 27,5% ва ё 384 ҳазору 299 нафар бештар аст”, – гуфт Ҷумъахонзода.

Кумитаи рушди сайёҳии кишвар мегӯяд, ки теъдоди сайёҳон аз кишварҳои хориҷи дур 32,8%  ва аз кишварҳои ИДМ 19,2% боло рафтааст.

Ба даҳгонаи аввали кишварҳое, ки шаҳрвандонашон ба Тоҷикистон чун сайёҳ омадаанд, инҳо шомил ҳастанд:

Ӯзбекситон – 1 млн 46 ҳазор 672

Русия- 396 ҳазор 475

Қирғизистон – 137 ҳазору 530

Қазоқистон – 37 ҳазор 288

Хитой – 33 ҳазору 178

Афғонистон – 14 ҳазор 577

Амрико – 12 ҳазор 350

Эрон – 11 ҳазору 866

Олмон – 7 ҳазор 668

Туркманистон – 6 ҳазор 475

ИЗОБРАЖЕНИЕ Ҷамшед Ҷумъахонзода

Ҷамшед Ҷумъахонзода гуфт, ки барои рушди сайёҳӣ ва ҷалби бештари сайёҳон ҳоло бо Чин лағви раводид баррасӣ мешавад ва “умедвор ҳастем, ки натиҷаи хуб медиҳад”.

Ба гуфтаи ӯ, ин яке аз роҳҳои ҷалби бештари сайёҳон аз бозори асосии сайёҳӣ ба кишвар аст.

“Барои Тоҷикистон кишварҳои арабӣ, Англия, Олмон, Фаронса, Русия, Чин, Кореяи Ҷанубӣ бозори асосии сайёҳиро ташкил медиҳанд”,- гуфт Ҷамшед Ҷумъахонзода.

Ба қавли ӯ, шаҳрвандони ин кишварҳо “бештар ба истироҳат ва сайёҳат завқ доранд”.

Аммо коршиносон ин омори пешниҳодкардаи Кумитаи рушди сайёҳиро ба чолиш мекашанд ва зикр мекунанд, ки он баёнгари вазъи воқеӣ нест. Дар асл теъдоди сайёҳони воқеӣ бамаротиб камтар аст ва ин тафовути рақамҳо дар пайи ҳисоби нодуруст ба миён омадааст. Яъне, теъдоди сайёҳон бо меъёри қабулшудаи ҷаҳонӣ ҳисоб нашудааст.

Дар Telegram, Facebook ва Instagram бо мо бимонед.

ЧОРАБИНИҲОИ МУҲИМ

– Имрӯз Кумитаи ҳолатҳои фавқулода ва мудофиаи гражданӣ (соати 09:00), Вазорати корҳои хориҷӣ (соати 10:00), Хадамоти зиддиинҳисорӣ (соати 11:00), Агентии инноватсия ва технологияҳои рақамӣ (соати 14:00), ҳукумати ноҳияи Нуробод (соати 09:00) ва шаҳри Роғун (соати 10:00) нишасти матбуотӣ доир мекунанд ва аз фаъолияти яксолаи худ назди рӯзноманигорон гузориш медиҳанд.

ЯК РӮЗИ ТАЪРИХ

Соли 1925 – Аввалин дастаи пулис таҳти роҳбарии комиссар Абдулло Ёрмуҳаммадов аз Бухоро ба Душанбе омад.

Соли 2008 – Шумораҳои аввалини рӯзномаи ВКД-и Тоҷикистон – “Қонун ва ҷомеа” ва рӯзномаи нерӯҳои марзбонӣ бо номи “Сарҳадчӣ” нашр шуданд.

Соли 2014 – Доир ба мубодилаи санадҳои тасвибии созишномаи байнидавлатӣ дар бораи шароит ва муҳлати будубоши пойгоҳи низомии Русия дар Тоҷикистон протокол ба имзо расид.

Соли 2020 – Эмомалӣ Раҳмон дастур дод, ки ба ҳар оилаи Тоҷикистон китоби “Тоҷикон” туҳфа карда шавад.

ШАХСИЯТҲО

Соли 1933 – Зодрӯзи Икромиддин Муҳиддинов, мардумшинос, доктори илмҳои таърих.

Соли 1942 – Мавлуди Ҷӯрабой Холиқов, кимиёдони тоҷик,  доктори илмҳои химия.

Соли 1967 – Зоҳир Дӯстматов, ҳунарпешаи театру синамои тоҷик, иҷрокунандаи нақши "Қори ишкамбу" дар синни 52-солагӣ даргузашт.

ИЗОБРАЖЕНИЕ Зоҳир Дустматов дар нақши "Корӣ ишкамба"

Симои Зоҳир Дӯстматов бо иҷрои нақши “Қори ишкамба” дар филми “Марги судхӯр” дар хотироти ҳар як бинандаи тоҷик фаромӯш нашудааст.

Ӯ Институти давлатии санъати театрии ба номи А. Луначарскийи шаҳри Маскавро хатм кардаааст. Фаъолияташро аз Театри Лоҳутӣ оғоз карда, муддате дар Театри мусиқӣ-мазҳакаи шаҳри Хуҷанд ҳунарнамоӣ кардааст. Баъдан боз ба театри Лоҳутӣ баргашта, то поёни умр он ҷо ҳунарманди ин театр будааст.

Зоҳир Дӯстматов  дар театр дар песаҳои “Шаби 28”, “Тӯҳфа барои хушхабар”, “Таърифхоҷаев” ва дар синамои тоҷик дар филмҳои “Дохунда”, “Коваи оҳангар”, “Қисмати шоир” ва ғайра нақш офаридааст. Барҷастатарин комёбии эҷодиаш симои Қорӣ Ишкамба аз филми бадеии “Марги судхӯр” мебошад, ки хислату характери қаҳрамонашро ҳамаҷиҳата инъикос карда тавонистааст.

САНАҲОИ МУҲИМИ ҶАҲОНӢ

Дар ин рӯзи соли 1626 дар Фаронса фармони манъи дуэлҳо имзо шуд. Ин тасмим бо мақсади ҳифзи беҳтарин сарбозони артиш гирифта шуд.

ИЗОБРАЖЕНИЕ

Луи XIII, ҳангоми имзои фармон изҳор дошт, ки ҳам даъваткунандагон ва ҳам даъватшудагон ба дуэл ҷазо хоҳанд гирифт, аз ҷумла аз ҳамаи мансабҳо, нафақаҳо ва дигар марҳаматҳои шоҳ маҳрум карда мешаванд.

6-уми феврали соли 1900 бори аввал дар ҷаҳон сигнали радиофонии хатари баҳрӣ фиристода шуд.

ИЗОБРАЖЕНИЕ

Дар ин рӯз, дар наздики ҷазираи Лавансарии Финландия яхе, ки 50 моҳигир рӯйи он буданд, пора шуд ва онҳоро ба баҳр бурд. Киштии яхшикани “Ермак” барои наҷоти моҳигирон ирсол гардид. Яхшикан фавран ба баҳр баромада, моҳигиронро бомуваффақият наҷот дод. Аввалин паёми радиофонии сигнали хатарро дар ҷаҳон олими рус Александр Попов ирсол кардааст.

Имрӯз Рӯзи ҷаҳонии бидуни телефонҳои мобилӣ таҷлил мегардад. Ҷонибдорони он ба одамон пешниҳод мекунанд, ки дар бораи фоида ва зиёни телефони мобилӣ андеша кунанд. Ҳарчанд алоқаи мобилӣ зиндагии моро осон кардааст, вале ҳамзамон мушкилоти зиёдеро низ эҷод кардааст.

Бовар меравад, ки идеяи баргузории “Рӯзи бидуни телефони мобилӣ” ба рӯзноманигор ва нависандаи фаронсавӣ Фил Марсо тааллуқ дорад, ки ӯ онро соли 2001 пешниҳод карда буд.

ИЗОБРАЖЕНИЕ

Оё шумо метавонед, ҳатто барои як рӯз аз телефони мобилӣ даст кашед?

ВАЗЪИ ҲАВО

Дар вилояти Суғд – Ҳавои абрнок пешгӯӣ шуда, дар баъзе ноҳияҳо борон ва барф меборад. Ҳарорат: дар водиҳо рӯзона 1+6º гарм, дар ноҳияҳои кӯҳӣ рӯзона -3+2º, дар водиҳо шабона -2+3º, дар ноҳияҳои кӯҳӣ шабона 2-7º сард, дар баъзе ноҳияҳо то 9-11º сард.

Дар вилояти Хатлон – Ҳавои абрнок пешгӯӣ шуда, борон ва барф борида, дар ноҳияҳои алоҳида баъзан шиддат мегирад. Ҳарорат: дар водиҳо рӯзона -1+4º, дар  доманакӯҳҳо рӯзона -2+3º, дар водиҳо шабона 0+5º гарм, дар ноҳияҳои доманакӯҳӣ шабона -2+3º.

Дар шаҳру ноҳияҳои тобеи ҷумҳурӣ – Ҳавои абрнок, борон ва барф борида, дар ноҳияҳои алоҳида баъзан ҳолатҳо шиддат мегирад. Ҳарорат: дар водиҳо рӯзона 0+5º гарм, дар ноҳияҳои кӯҳӣ рӯзона -2+3º, дар водиҳо шабона 0+5º гарм, дар ноҳияҳои кӯҳӣ шабона 7-12º сард, дар баъзе ноҳияҳо то 0+2º гарм.

Дар Вилояти Мухтори Кӯҳистони Бадахшон – Ҳавои абрнок пешгӯӣ шуда, дар баъзе ноҳияҳо борон ва барф меборад. Ҳарорат: дар ғарби вилоят рӯзона 2+7º гарм, дар шарқи вилоят рӯзона 1-6º сард, дар баъзе минтақаҳо то 10-12º сард, дар ғарби вилоят шабона 4-9º сард, дар баъзе ноҳияҳо то 2+4º гарм, дар шарқи вилоят шабона 17-22º сард, дар баъзе минтақаҳо то 32-34º сард.

Дар шаҳри Душанбе – Ҳавои  абрнок пешгӯӣ шуда, борон ва барф борида, баъзан ҳолатҳо бошиддат меборад. Ҳарорат: рӯзона 1+3º гарм, шабона 0+2º гарм.

Дар шаҳри Хуҷанд – Ҳавои абрнок пешгӯӣ шуда, баъзан ҳолатҳо борон меборад. Ҳарорат:рӯзона 3+5º гарм, шабона -1+1º.

Дар шаҳри Бохтар – Ҳавои абрнок пешгӯӣ шуда, борон ва барф меборад. Ҳарорат: рӯзона 1+3º гарм, шабона 0+2º гарм. 

Дар шаҳри Хоруғ – Ҳавои абрнок пешгӯӣ шуда, баъзан ҳолатҳо борон ва барф меборад. Ҳарорат: рӯзона 1+3º гарм, шабона 6-8º сард.

*Ҳарорати шабонаи ҳаво шаби 6 ба 7-уми феврал ба ҳисоб гирифта шудааст.

Дар Telegram, Facebook ва Instagram бо мо бимонед.

Имрӯз, 5-уми феврал аз эълони ҳукми Рухшона Ҳакимова, рӯзноманигори тоҷик, ки соли 2025 бо ҳукми додгоҳ бо иттиҳоми “хиёнат ба давлат” ба муддати 8 сол равонаи зиндон шуд, як сол гузашт. Давоми ин муддат, ҳам созмонҳои байналмилалӣ, ҳам пайвандон ва ҳам вакили дифои ӯ ба унвони мақомоти дахлдор, аз ҷумла раисҷумҳур ва Додситонии кул нома навишта, бозбинии ҳукмро хостаанд, аммо то ҳол натиҷае ҳосил нашудааст.

Дар баробари ин, созмонҳои рӯзноманигорӣ ва дифоъ аз ҳуқуқи инсон ҳам борҳо аз мақомоти Тоҷикистон бозбинии ҳукми Рухшона Ҳакимоваро хостанд. Аз ҷумла, Созмони байналмилалии Гузоришгарони бидуни марз (RSF), Дидбони ҳуқуқи башар (HRW)  ва Эътилофи байналмилалии дифоъ аз ҳуқуқи башар (The Observatory for the Protection of Human Rights Defenders)  ҳукми 8 соли зиндони Рухшона Ҳакимоваро маҳкум карда, аз мақомоти Тоҷикистон озодии ӯро талаб карданд.

Номаи бонувони рӯзноманигори тоҷик ба унвони раисҷумҳури кишвар ҳам барои аз зиндон раҳо шудани Рухшона кумак накард. Ӯ ҳоло дар зиндони занонаи шаҳри Норак аст. Ду фарзанди хурдсоли ӯ бо шавҳараш ва волидонаш калон мешаванд.

Хонаводаи Рухшона Ҳакимова имрӯз дар пойтахти кишвар, дар хонаи иҷора зиндагӣ доранд. Ду кӯдаки ноболиғаш хумори дурии модар мекашанд ва бо дидани аксҳои ӯ ва дидоре, ки моҳе як бор муаяссар мешавад, оташи пазмониашонро андаке хомӯш мекунанд.

Ягона суоле, ки то ҳол пайвандонаш пайваста такрор мекунанд ва посух наёфтаанд, ин аст, ки “ҷурми Рухшона чӣ буд?”.

“Ягона умедам ба шумост”. Номаи Рухшона ба Эмомалӣ Раҳмон

Ахиран, нусхаи мактуби худи Рухшона Ҳакимова ба унвони Эмомалӣ Раҳмон, раисҷумҳури кишвар, ки аз зиндон навиштааст, дастраси “Азия-Плюс” шуд. Ӯ дар он мактуб аз раисҷумҳури кишвар хостааст, ба қазияаш расидагӣ кунад.

Рухшона дар мактуб менависад, ӯ барои он маҳкум шуд, ки гӯё ҳамчун рӯзноманигор дар иртибот ба муносибатҳои Тоҷикистону Чин бо 30 таҳлилгару журналисти Тоҷикистон мусоҳиба анҷом дода, “маълумотеро, ки ба сирри давлатӣ мансуб будааст, ба яке аз давлатҳои хориҷа фиристодааст”.

Дар номаи худ вай таъкид кардааст, ки дар мусоҳибаҳо вобаста ба “кӯмакҳои байналмилалии Хитой” танҳо фикри шахсии коршиносон пурсида шуда, бо ягон нафари онҳо дар бораи маълумоти дорои сирри давлатӣ суҳбат нашудааст.

Рухшона зикр мекунад, ки ташкилоти “Барометр”, ки бо ӯ шартномаи кутоҳмуддат дошт, ба рӯйхати ташкилотҳои фаъолияташон мамнуъ дар Тоҷикистон ворид нашудааст ва дар рафти тафтишот низ “аз ташкилоти хориҷӣ супориши махсус гирифтани ӯ вобаста ба ҷамъ намудани маълумоти дорои сирри давлатӣ исбот нашуд”.

“Дар хулосаи эксперт аниқу мушаххас нишон дода нашудааст, ки маҳз кадом гуфтаҳои респондентон сирри давлатиро ошкор кардаанд”, – менависад Рухшона.

Ба гуфтаи ӯ, коршиносоне, ки вай бо онҳо мусоҳиба анҷом дод, дар ягон мақоми қудратии Тоҷикистон фаъолият намекунанд ва танҳо ақидаи шахсии худро баён кардаанд.

Номбурда аз президент имдод хостааст, ки қазияашро бевосита пайгирӣ намуда, “ҳақро ба ҳақдор расонад”.

“Ягона умедам ба шумост”, – хостааст ӯ аз президенти кишвар.

Баъди навиштани ин мактуб, аз Додситонии кулли кишвар ба волидони Рухшона Ҳакимова посух омадааст, ки ҳукм қонунӣ буда, барои бекор кардан ё тағйир додани он асос мавҷуд нест.

ИЗОБРАЖЕНИЕ

“Муҳокимаи одилона ва беғаразонаи додгоҳӣ таъмин карда шавад”

Ҳамчунин, баъди як моҳи эълони ҳукми додгоҳ, Созмони таҳқиқотии “Барометр” (Central Asia Barometer Canada) дар робита ба парвандаи Рухшона Ҳакимова ба Ҳабибулло Воҳидзода, додситони кулли Тоҷикистон нома навишта, бознигарии ҳукми ӯро хостааст.

Дар нусхаи номае, ки ба дасти мо расид, Татяна Волкова, директори ин созмон гуфтааст, воқеан бо Рухшона Ҳакимова 21-уми январи соли 2024 шартнома баста шуд, аммо “вазифаи ӯ танҳо дар ҷустуҷӯи посухдиҳандагон аз се соҳаи фаъолият ва анҷом додани мусоҳибаҳо тибқи саволномаи аз ҷониби гурӯҳи илмӣ тасдиқшуда маҳдуд мешуд”.

Бояд гуфт, ин таҳқиқот ҳанӯз нашр нашудааст.

Созмони осиёимиёнагии “Барометр” аз мақомоти Тоҷикистон даъват кардааст, “агар парвандаи Рухшона Ҳакимова воқеан бо ҳамкории кӯтоҳмуддати ӯ бо ин созмон вобаста бошад, қазия аз нав баррасӣ шуда, муҳокимаи одилона ва беғаразонаи додгоҳӣ таъмин карда шавад”.

“То замоне, ки озод нашавед, мубориза мебарем”

Поёни моҳи декабри соли 2025, замоне ки ҳама ба таҷлили Соли нав омодагӣ медиданд Созмони байналмилалии “Гузоришгарони бидуни марз” аз рӯзноманигорони зиндонишуда, аз ҷумла, Рухшона Ҳакимова ёдовар шуда, гуфт, “муборизаро барои озодии рӯзноманигорон ва озодии сухан дар саросари ҷаҳон бо азми боз ҳам қавитар идома хоҳад дод”.

“Мо аз ҳукуматҳо талаби масъулият мекунем, ба додгоҳҳо аз уҳдадориашон ёдрас мешавем. Мо то замоне, ки шумо озод нашавед ва натавонед дубора ба кори худ баргардед, мубориза мебарем”, – навиштааст ин созмон.

Имрӯз, 5-уми феврал бори дигар Созмонҳои байналмилалӣ, аз ҷумла “Гузоришгарони бидуни марз” аз Рухшона Ҳакимова ёд оварда, “ин ҳукми худсарона ва ноодилонаро маҳкум ва озодии фаврии ӯро талаб карданд”.

Аммо мақомоти Тоҷикистон то ҳол ба он вокуниш накардаанд.

“Барои озодиаш талош мекунем”

Бино ба охирин маълумоти дастраскардаи “Азия-Плюс” пайвандон ва вакили дифои Рухшона тасмим доранд, барои таъмини адолат ва муҳокимаи одилонаи парванда ба Шурои Созмони милали муттаҳид (СММ) оид ба ҳуқуқи башар муроҷиат кунанд.

Туроб Дилаев, вакили дифои Рухшона Ҳакимова гуфт, Рухшона иттиҳомро напазируфтааст ва бо вуҷуди он ки талошҳояш барои озодии ӯ то ҳол натиҷае надодаанд, ҳанӯз аз мубориза даст накашидааст.

“Ба президенти кишвар ва Додситонии кулл такроран нома менависем ва барои озодиаш талош хоҳем кард”, – мегӯяд ӯ.

Дар Telegram, Facebook ва Instagram бо мо бимонед.