Ҳаракати нақлиёт тавассути роҳи мошингарди ағбаи Хобуробод, ки тариқи ноҳияи Тавилдара маркази кишварро бо ВМКБ мепайвандад, манъ карда шуд.
Тавре ба ОИ «Азия-Плюс» аз Вазорати нақлиёти ҷумҳурӣ хабар доданд, манъи ҳаракати нақлиёт тавассути ин роҳ ба боришоти зиёди барф дар минтақаи мазкур вобаста аст. Айни замон баландии барф дар ағба аз 40 см то 1 метрро ташкил медиҳад.
Ба иттилои манбаъ, барқарор шудани ҳаракати нақлиёт тавассути ин роҳ танҳо нимаи моҳи майи соли оянда дар назар буда, дар ин давра ҳаракати нақлиёт аз пойтахти ҷумҳурӣ ба ВМКБ тариқи роҳи мошингарди Душанбе-Кӯлоб-Шӯрообод-Дарвоз-Хоруғ амалӣ мегардад.
Зимнан зикр гардид, ки ҳаракати нақлиёт дар дигар роҳҳои мошингарди кишвар тавассути ағбаҳои баландкӯҳ мувофиқи реҷаи муқаррарӣ ба роҳ монда шудааст.
