Ҳукумати Ҷопон дар чаҳорчӯбаи кӯмакҳои бебозгашти лоиҳаҳои амнияти башарӣ барои бахши аъзами аҳолӣ дар Тоҷикистон алҳол амалӣ гаштани лоиҳаҳои гуногун дар соҳаҳои мухталифро дастгирӣ намудааст.
Тавре аз сафоратхонаи Ҷопон дар Тоҷикистон хабар доданд, тибқи Барномаи кӯмакҳои бебозгашт санаи 13 декабри соли равон ҷаноби Ҳиройуки Имҳаши, сафири Ҷопон дар Тоҷикистон, созишномаҳои грантиро оид ба амалӣ гаштани 5 лоиҳаи мухталиф барои дастгирии соҳаи маориф дар ноҳияҳои Спитамен ва Шӯрообод ва ҳамчунин барои беҳтар намудани соҳаи ҳифзи тандурустӣ дар ноҳияҳои Шаҳринав, Мурғоб ва Ишкошим ба имзо расонд.
Ба иттилои манбаъ, лоиҳаҳои зайл тавассути лоиҳаҳои кӯмакҳои бебозгашт роҳандозӣ мешаванд: «Лоиҳаи барқарор намудани мактаби № 28 дар деҳаи “Нов”-и ноҳияи Спитамен», ба маблағи 113,439 доллари ИМА; «Лоиҳаи сохтмони бинои нави мактаби миёнаи рақами 4-и деҳаи “Доғистон”, ҷамоати Доғистони ноҳияи Шуробод» ба маблағи 111,889 доллари ИМА; «Лоиҳаи барқарорсозии шӯъбаи ҷарроҳии беморхонаи Марказии ноҳияи Шаҳринав» ба маблағи 107,017 доллари ИМА; «Лоиҳаи беҳтаргардонии беморхонаи Марказии ноҳияи Ишкошим» ба маблағи 108,655 доллари ИМА ва «Лоиҳаи беҳтаргардонии беморхонаи маҳалӣ дар ҷамоати Қарақули ноҳияи Мурғоб» ба маблағи 120,373 доллари ИМА.
Лоиҳаҳои мазкур аз ҷониби худи мардуми Тоҷикистон амалӣ мешаванд. Такмили соҳаи маориф ба ҳаёти кӯдакон ва ҳамчунин ҷомеаи ин маҳаллҳо таъсири мусбату давомдор хоҳад расонд. Илова бар ин, дастрас намудани хизматрасонии тиббии муносиб ва боэътимод ҳуқуқи аввалиндараҷаи ҳар як инсон ба ҳисоб рафта, амалӣ гаштани лоиҳаҳои номбурда барои вусъат бахшидани зиндагии мардум ва ҳуқуқи онҳо дар ҷомеа мусоидат хоҳад намуд.
Ҳукумати Ҷопон баҳри бунёд сохтани ҷомеаи боз ҳам беҳтар барои халқи Тоҷикистон дар ҳамкорӣ бо мардуми Тоҷикистон дастгирии худро давом медиҳад.
Кӯмакҳои бебозгашти лоиҳаҳои амнияти башарӣ барои бахши аъзами аҳолӣ ба ҳокимиятҳои маҳаллӣ, соҳаҳои маорифу тандурустӣ ва созмонҳои байналмиллалии ғайридавлатии мамлакатҳои рӯ ба тараққӣ расонида мешавад. Ҳукумати Ҷопон аз соли 1996 инҷониб барои бахши аъзами аҳолӣ 290 лоиҳаҳои кӯмаки башариро ба маблағи умумии $22 миллион доллари ИМА дар Тоҷикистон амалӣ намудааст.
