Дар шаҳри Маскав миёни намояндагии Хадамоти муҳоҷирати назди ҳукумати ҶТ дар Русия ва Ҷамъияти саҳҳомии бима (суғурта)-и «ВСК» Созишнома дар бахши бима ба имзо расид.
Бино ба маълумоти намояндагии ХМ ҶТ дар Русия, созишнома аз ҷониби роҳбари намояндагии Хадамоти муҳоҷират Асрор Одинаев ва мудири кулли «ВСК» Олег Овсянитский ба имзо расида, ба ҳимояти манфиатҳои иҷтимоиву иқтисодии шахсони воқеӣ, дар ҳолати мазкур – муҳоҷирони меҳнатӣ, шаҳрвандони Тоҷикистон равона гардидааст.
Ба андешаи Асрор Одинаев, имзои созишномаи мазкур ба таъмини дастрасии муҳоҷирони тоҷик ба хизматгузории хушсифати тиббӣ дар қаламрави Русия мусоидат хоҳад кард.
Гуфта мешавад, дар ҳуҷҷат бимаи тиббии ихтиёрии муҳоҷирони тоҷик, шаҳрвандони Тоҷикистон дар қаламрави Русия пешбинӣ мегардад. «ВСК» барномаи хароҷоти таъҷилии тиббӣ барои муҳоҷирони кориро пешниҳод мекунад.
