Шоми 31-уми декабр дар майдони Дӯстии шаҳри Душанбе бо иштироки овозхонони маъруфи эстрадаи тоҷик чорабинии идона доир мегардад. Чорабинии идона соати 20:00 оғоз ва муддати 2 соат идома ёфта, бо фейерверки 5-дақиқаина анҷом мепазирад.
Тавре ба ОИ «Азия-Плюс» котиби матбуотии раиси шаҳри Душанбе Шавкат Саидов хабар дод, субҳи рӯзи шанбеи ҳафтаи равон дар бинои Сирки давлатӣ намоишномаи идонаи солинавӣ баргузор мегардад, ки ба он ҳудуди 2 ҳазор нафар толибилмони аълохони макотиби таҳсилоти умумии пойтахт, тарбиятгирандагони мактаб-интернатҳои Душанбе ва кӯдакон аз оилаҳои камбизоат даъват шудаанд. «Ба ҳамаи онҳо аз номи мақомоти шаҳрдорӣ туҳфаҳои солинавӣ тақдим хоҳанд шуд», – гуфт ӯ.
Шавкат Саидов таъкид кард, ки айни замон дар тамоми бозорҳои шаҳр ярмарка-фурӯши маводи ғизоӣ ва маҳсулоти ниёзи аввалияи мардум бо нархҳои дастрас оғоз гардидаанд.
