Душанбе. 23-уми октябр. ОИ «Азия-Плюс» – Дирӯз мулоқоти кории раҳбарияти Кумитаи давлатии амнияти миллӣ бо ҳайати Вазорати умури дохилии Финландия таҳти сарварии вазири умури дохилии ин кишвар Анне Холмлунд баргузор гардид.
Тавре аз Сарраёсати нерӯҳои марзбонии кумитаи мазкур ба ОИ «Азия-Плюс» хабар доданд, дар мулоқот масоили ҷилавгирӣ аз интиқоли маводи мухаддир тавассути марз бо Афғонистон, таҳкими назорат аз болои қочоқи маводи мухаддир, муҳоҷирати ғайриқонунӣ, мубориза алайҳи терроризми байнулмилалӣ ва ифротгароии динӣ мавриди муҳокима қарор гирифтанд.
Таъкид гардид, ки Тоҷикистон барои беҳбуди вазъ дар марз бо Афғонистон кӯшишҳои зиёд ба харҷ медиҳад. Дар анҷоми мулоқот ҷониби Финландия изҳор дошт, ки дар ҳалли мушкилоти мавҷуда дар марзҳо омода аст, ба Тоҷикистон кӯмаки молиявӣ расонад.
