Вазири фарҳанги ҷумҳурӣ Мирзощоҳрух Асрорӣ зимни конфронси матбуотӣ изҳор намуд, ки дар анборҳои вазорат китобҳои тайи чанд соли ахир нашршуда ба маблағи 5 млн. сомонӣ ҷамъ шудаанд.
Ба қавли вазир, як ҳафта пеш оид ба ин масъала дар вазорат ҷаласа доир гардида, ҷиҳати дарёфти воситаҳои фурӯши ин китобҳо бо ҷалби мутахассисон ва кӯмаки ҳукумати кишвар қарор қабул гардидааст.
«Мушкили асосӣ дар он аст, ки имрӯз мардум ба хониши китоб таваҷҷуҳ надоранд. Барои ҷалби таваҷҷуҳи насли наврас ба мутолиаи китоб вазорат ҳамасола ярмаркаҳои китобу озмунҳо мегузаронад, вале аз он ҳам натиҷаи хубе ҳосил намешавад», – гуфт М.Асрорӣ.
Номбурда таъкид дошт, ки имрӯз ҷавонон бештар ба китобҳои электрониву интенет рӯ овардаанд, вале ҳеҷ чизе баҳра бурдан аз хондани китоби чопиро иваз карда наметавонад.
«Баъзан аз муносибати мардум ба китоб дар ҷомеаи мо ба ҳайрат меоям. Дар кишварҳои дигар мардум аз ярмаркаҳо бо як даста китобҳои харида ба хона бармегарданд. Дар ҷомеаи мо чунин чорабиниҳо қариб ҳеҷ натиҷае намедиҳанд», – иброз дошт вай.
Вазири фарҳанг ҳамчунин зикр кард, ки нархи китобҳои дар анбор хобида он қадр зиёд набуда, қобили қабул аст. «Минбаъд вазорат бо назардошти натанҳо имкони молиявӣ, балки дархосту завқи мардум низ китобҳо ба табъ хоҳад расонид», – афзуд М.Асрорӣ.
