Вазири энергетика ва саноати ҷумҳурӣ зимни нишасти хабарӣ дар робита ба масъалаи воридоти гази табиӣ аз Ӯзбекистон изҳор намуд, ки ин масъала то ҳанӯз ҳал нашудааст, вале гуфтушунидҳо дар сатҳи ҳукуматҳо ва миёни «Тоҷиктрансгаз» ва «Ӯзбекнефтегаз» идома доранд.
«Аз гуфтушунидҳо ҳоло ҳеҷ натиҷае ҳосил нашуда, Ӯзбекистон мавқеи худро дар ин масъала шарҳ намедиҳад», – гуфт ӯ.
Вазир иброз дошт, ки алтернативаи гази табиӣ исеҳсоли газ аз ангишт буда, Корхонаи алюминии тоҷик ба истифодаи он гузаштааст. «Ҳамарӯза мувофиқи талаби корхона он бо 320 тонна ангишт таъмин карда мешавад», – зикр кард вай.
Ба қавли Гул Шералӣ, насби таҷҳизоти истеҳсоли газ аз ангишт дар «Тоҷиксемент» низ дар назар буда, оид ба ин масъала бо ширкати чинӣ мувофиқа ҳосил шудааст. «Корҳои насби таҷҳизот ҳудуди 8 моҳ давом мекунанд, аммо худи «Тоҷиксемент» ин масъаларо ба дарозо мекашад», – гуфт вазири энергетика.
Қобили зикр аст, ки соли дуюм аст, ки ширкатҳои марбут ба гази Тоҷикистону Ӯзбекистон ба имзои созишнома оид ба воридоти газ ба Тоҷикистон саривақт ба мувофиқа омада наметавонанд. Аввали моҳи январи соли 2012 низ чунин вазъ ба амал омада, он замон бо қатъи интиқоли газ ҳайати ҳукумат дарҳол озими Тошканд ва масъаларо ҳал намуда буд.
Моҳи апрели соли гузашта низ «Узтрансгаз» интиқоли газ ба Тоҷикистонро қатъ карда, сабаби онро «мавҷуд набудани захираҳо» ва анҷоми муҳлати қарордод унвон карда буд.
Бино ба маълумоти «Тоҷиктрансгаз», соли гузашта ба Тоҷикистон аз кишвари ҳамсояи Ӯзбекистон 132,4 млн. метри мукааб гази табиӣ ворид шуд. Мувофиқи қарордод, соли 2012 Тоҷикистон аз Ӯзбекистон бояд 145 млн. метри мукааб газ дастрас мекард, ки арзиши он 300 $ барои 1 ҳазор метри мукаабро ташкил дод.
Истеъмолгарони асосии гази Ӯзбекистон дар Тоҷикистон Ширкати алюминии тоҷик (ТАЛКО) ва корхонаи «Тоҷиксемент» ба шумор рафта, нархи 1 ҳазор метри мукааби газ барои онҳо дар соли равон 380 $ муқаррар шудааст. Тайи 6 соли ахир аҳолии Тоҷикистон аз истифодаи гази табиӣ маҳрум аст.
