Зимни нишасти хабарии имрӯза вазири корҳои дохилии Тоҷикистон Рамазон Раҳимов изҳор намуд, ки мақомоти қудратии кишвар ба пешгирии ҳама гуна сенарияи гурӯҳҳои ҷудогона дар маъракаи интихоботи президенти ҷумҳурӣ омодаанд.
Ба қавли ӯ, ҷиҳати такмили малакаҳо дар мавриди таъмини тартиботи ҷамъиятӣ ва пешгирии бенизомиҳо, бо воҳидҳои махсуси милиса як силсила машғулияту тамринҳо гузаронида шуданд.
«Ҳеҷ кас инкор карда наметавонад, ки дар ҳама гуна ҷомеа гурӯҳҳое мавҷуданд, ки рӯйдодҳои вақти кишвар табъи дилашон нест ва онҳо ба изҳори норозигиашон бо роҳи ғайриқонунӣ омодаанд ва имрӯз мақомоти қудратӣ ба пешгирӣ ва посух ба ин гуна афрод ва амалҳои иғвогаронаи онҳо қодиранд», – таъкид дошт вазир.
Дар посух ба саволи журналистон дар бораи сабаби аз моҳи апрел ба посбонии шабона фаро гирифта шудани намояндагони мақомоти қудратӣ дар баробари кормандони милиса, Раҳимов чунин изҳор кард: «Ин ба чорабиниҳои муҳими дар шаҳри Душанбе пешбинишуда рабт дорад».
«Ғайр аз ин, дар давраи посбонӣ кормандони Вазорати мудофиа ва Гвардияи миллӣ таъмини ҳифзи иншооти ба зимма гузоштаашонро пурзӯр мекунанд. Дар маҷмӯъ гуфта метавонам, ки посбонии шабона натиҷа ба бор меоварад – фазои шаҳр оромтар гардида, як қатор ҷиноятҳо ошкор ва пешгирӣ шуданд. Кормандоне, ки шабона посбонӣ мекунанд, рӯзона аз кор озоданд», – афзуд вазир.
Ёдрас мекунем, ки шурӯъ аз моҳи апрел кормандони мақомоти интизомӣ (Кумитаи давлатии амнияти миллӣ, Вазорати мудофиа, Гвардияи миллӣ, Агентии назорати маводи нашъаовар ва Агентии зиддифасод)
мунтазам ба посбонии шабона дар пойтахт машғуланд.
