Иқдоми хайриявии Ҳизби Халқии Демократии Тоҷикистон “Роҳ ба сӯи мактаб”, ки дар шаҳру навоҳии ҷумҳурӣ идома дорад, аз ҷониби масъулини ва фаъолони ҲХДТ дар Вилояти Мухтори Куҳистони Бадахшон низ дастгирӣ ёфт.
Бино ба иттилои сомонаи расмии ҲХДТ, бо ибтикори се нафар аъзои фаъоли ҲХДТ ба тарбиятгирандагони хона – парваришгоҳи ҷумҳуриявии ноҳияи Рӯшон ба маблағи 8000 сомонӣ лавозимоти хониш ва сару либос тақдим карда шуд. Ҳамзамон бо дастгирии аъзои ҲХДТ Чиниев Қадамшоҳ 8 нафар ятимони бепарастори шаҳри Хоруғ бо сару либои мактабӣ ва лавозимоти дарсӣ таъмин карда шуданд.
Шамиров Кишвар, ки аз фаъолони ҲХДТ мебошад, дар ҳаҷми 1200 сомонӣ ба ин гуна ятимони шаҳри Хоруғ кӯмаки амалӣ расонид. Дар ноҳияи Роштқалъа дар ҳаҷми 1050 сомонӣ ба се нафар кӯдаки оилаҳои ниёзманд аз ҷониби Худододов Қурбонҳусейн дар доираи аксияи “Роҳ ба сӯи мактаб” сару либос ва лавозимоти хониш тақдим карда шуд.
Ҳизби халқии демократии Тоҷикистон соли 1994 таъсис ёфта, айни замон шумори аъзои он беш аз 220 ҳазор нафарро ташкил медиҳад. Ҳудуди 40 дарсади аъзои ҳизб ҷавонон мебошанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
