Душанбе. 16-уми сентябр. ОИ «Азия-Плюс» – Тоҷикистону Ӯзбекистон дар бораи интиқоли нерӯи барқи Туркманистон тавассути низоми энергетикии Ӯзбекистон ба Тоҷикистон тавофуқ ҳосил карданд. Дар ин бора ба ОИ «Азия-Плюс» муовини сармуҳандиси ширкати саҳомии холдинги кушодаи «Барқи тоҷик» Рашид Гулов хабар дод.
Ба қавли ӯ, интиқоли барқи Туркманистон ба Тоҷикистон пас аз таъмири хатти баландшиддати интиқоли барқ дар Ӯзбекаитон имконпазир мегардад.
«Дар фасли тобистон Тоҷикистон қарзи худро аз истифодаи барқ ба Ӯзбекситон тавассути маҳз ҳамин хат интиқол дода буд ва феълан дар он ҷо корҳои таъмир босуръат идома доранд ва шояд ахири ҳамин моҳ интиқоли барқ ба Тоҷикистон шурӯъ гардад», – гуфт Р.Гулов.
Қобили зикр аст, ки дар давраи тирамоҳу зимистон ба Тоҷикистон аз хориҷи кишвар 1,8 млрд. кВт/соат нерӯи барқ, аз ҷумла
1, 2 млрд. кВт/соати он аз Туркманистон интиқол дода мешавад.
