Боз шудани сафҳаи расмии номзади ягонаи Иттиҳоди нерӯҳои ислоҳотхоҳи Тоҷикистон (ИНИТ) ба мақоми президентӣ Ойниҳол Бобоназарова дар Facebook-ро сухангӯйи ӯ Абдуқаюми Қаюмзод имрӯз ба Хабаргузории «Азия-Плюс» такзиб кард.
Дар баёнияи ирсолкардаи Қаюмзод чунин омадааст:
«Дӯстони арҷманд! Сафҳае, ки иддао мекунад, мутааллиқ ба Ойниҳол Бобоназарова, номзади Иттиҳоди нерӯҳои ислоҳотхоҳи Тоҷикистон мебошад, дуруст нест. Муаллима то ҳанӯз сафҳае дар шабакаи иҷтимоӣ боз накардаанд. Ба матолиб, мавод, маълумот ва ҳар он чизе дигар, ки дар ин сафҳа дарҷ мешавад, хоҳиш мекунам, бовар накунед».
Дар посух ба суоли «Оё сафҳаи расмии номзади ягонаи ИНИТ дар Facebook ва шабакаҳои дигари иҷтимоӣ боз хоҳад шуд?» Абдуқаюми Қаюмзод гуфт:
– Баъд аз Анҷуманҳои Ҳизби наҳзати исломии Тоҷикистон ва Ҳизби сотсиал-демократии Тоҷикистон, ки хонум Бобоназарова расман номзад ба мақоми Президенти ҶТ бишавад, сафаҳоти расмии ӯро дар шабакаҳои гуногуни иҷтимоӣ боз мекунем.
Сухангӯйи ИНИТ дар шарҳи масъалаи пешбарии номзади ягона афзуд: «Бар тибқи қонунгузории Ҷумҳурии Тоҷикистон, Ойниҳол Бобоназарова аз ҷониби ҳизби сиёсии расман сабтиномшуда пешбарӣ мешавад, зеро Иттиҳоди нерӯҳои ислоҳотхоҳи Тоҷикистон як созмони расмӣ нест, балки ташаккули фарогири чанд созмони иҷтимоӣ, ду ҳизб ва чеҳраҳои матраҳи
ҷ
омеа аст. Аммо номзад ба мақоми президентиро аҳзоби сабтиномшудаи сиёсӣ, Иттифоқи ҷавонони Тоҷикистон, Федератсияи иттифоқҳои касабаи мустақили
Тоҷикистон
, маҷлисҳои вакилони халқи ВМКБ ва шаҳри Душанбею вилоятҳо ҳаққи пешбарӣ доранд. Хонум Бобоназарова баъд аз таъйиди вакилони Анҷумани ҲНИТ ва ё ҲСДТ расман номзад хоҳад шуд».
