Рӯзи 18-уми октябри соли равон Ҷамолов Абдуҷабори 15-сола, сокини деҳаи Калназари ноҳияи Рашт, ба кӯҳи ҷамоати деҳоти Оби Меҳнат раҳсипор гашта, ба ҷамъоварии чормағз машғул буд.
Ҳангоми саргарми кор будан, нобаҳангом хирсе пайдо мегардад, ки якбора ба саги Абдуҷабор ҳамла намуда, дар як лаҳза ӯро бо зарбаи панҷаи худ ба ҳалокат мерасонад. Сипас ба ноболиғ ҳуҷум карда, чанд маротиба бо нохунҳояш ба сару тани ӯ ҷароҳати вазнини ҷисмонӣ мерасонад. Хушбахтона Ҷамолов Абдуҷабор аз чанголи хирс раҳо ёфта, дар беморхона бистарӣ гардидааст. Дар ин бора сомонаи расмии ВКД ҶТ хабар медиҳад.
Қобили зикр аст, ки фасли тирамоҳ, фаслест, ки ҳамагон ба ғундоштани ҳосил машғуланд ва дар ин айём дар ноҳияҳои баландкӯҳ мардум ба ғундоштани чормағзу дулона ва дигар мевагиҳо саргарм мебошанд.
