Дар маҳаллаи «Гулистон-и шаҳри Хуҷанд бо иштироки раиси шаҳр Раҷаббой Аҳмадзода «Биржаи меҳнат» барои кироякорон ба фаъолият оғоз намуд.
Бино ба иттилои хадамоти матбуоти раиси шаҳри Хуҷанд, дар ин иншооти навбунед барои кироякорон тамоми шароит мухайё буда, барои сохтмони он 52 ҳазор сомонӣ маблағ сарф шудааст.
«Ҳадаф аз бунёди ин иншоот бо сарпаноҳи доимӣ таъмин намудани кироякорон дар фасли гармову сармо аст. «Биржаи меҳнат» аз ҷониби соҳибкори маҳаллӣ Абдулло Абдуҳалимов бунёд ёфта, барои ҷой ва дигар шароитҳои мавҷуда маблағ ситонда намешавад», – омадааст дар хабари мақомоти шаҳрдории Хуҷанд.
Гуфта мешавад, раиси шаҳри Хуҷанд ҳангоми суханронии худ кайд кардааст, ки бо ҷойи корӣ таъмин намудани мардум яке аз вазифаи муҳими давлат ба хисоб меравад, аз ин хотир имсол дар шаҳр 1700 адад ҷойи нави корӣ ташкил гардидааст.
Зимнан зикр мегардад, ки Раҷаббой Ахмадзода аз кироякорон даъват намуд, то маърифати шаҳрдориро риоя намуда, тартиботи ҷамъиятиро риоя кунанд.
