Кумитаи иҷроияи марказӣ (КИМ)-и ҲХДТ нақшаи чорабиниҳо оид ба бартараф намудани камбудиҳо дар фаъолияти бахшҳои минтақавии ҳизбро, ки зимни маҷлиси ҳизб раиси ҲХДТ, президенти мамлакат Эмомалӣ Раҳмон ба онҳо ишора карда буд, таҳия намуд.
Усмон Солеҳ, мудири шӯъбаи таблиғот, иттилоот ва матбуоти Дастгоҳи КИМ ҲХДТ ба «Азия-Плюс» дар ин робита иттилоъ дод, ки нақшаи чорабиниҳо ба ҳамаи бахшҳои минтақавии ҳизб ирсол гардида, асоси онро даст кашидан аз расмиятгарӣ, навсозии усул ва методҳои кор бо аҳолии кишвар ташкил медиҳад.
Ба гуфтаи ӯ, имрӯзҳо КИМ ҲХДТ дар самти ба субут расонидани корҳои омодагӣ ба анҷумани пешазинтихоботии ҳизб, ки санаи 13-уми декабр дар «Кохи Ваҳдат»-и пойтахт доир мегардад, фаъолона ҷаҳду талош меварзад. Дар анҷумани мазкур аз иштироки беш аз 1 ҳазору 200 нафар вакилон аз саросари кишвар интизорӣ меравад.
Номбурда ҳамчунин зикр кард, ки КИМ ҲХДТ ва бахшҳои минтақавии ҳизб дар самти иҷрои дастури пешвои ҳизб ҷиҳати дар интихоботи парлумонӣ пешбарӣ кардани номзадҳои ҷавон ва шоиста ва ҳамчунин афзудани шумори номзадҳо ба вакилӣ аз ҳисоби занон тадбирҳо меандешанд.
Ҳизби халқии демократии Тоҷикистон 10-уми декабри соли 1994 таъсис ёфта, айни замон шумори аъзои он ҳудуди 250 ҳазор нафарро ташкил медиҳад. Ҳудуди 40 дарсади аъзои ҳизб ҷавонон мебошанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
