Шаби гузашта ҳамаи қисмҳои низомии Вазорати мудофиа дар гарнизони Хатлон ва сарбозону афсарони эҳтиётӣ аз 25 ноҳияи ҷануби кишвар тибқи бонги хатар (тревога) даъват шуданд.
Сардори маркази матбуоти Вазорати мудофиаи ҶТ Фаридун Маҳмадалиев ба «Азия-Плюс» дар ин робита иттилоъ дод, ки дар қаламрави вилояти Хатлон тамринҳои комплексии ҳайати фармондеҳӣ ва ситод оғоз гардиданд, ки дар он беш аз 30 ҳазор сарбозону афсарони артиши миллӣ ва эҳтиётӣ аз тамоми шаҳру навоҳии минтақаи ҷануби ҷумҳурӣ иштирок мекунанд.
Бино ба иттилои манбаъ, тамринҳо таҳти фармондеҳии вазири мудофиаи Тоҷикистон, генерал-лейтенант Шералӣ Мирз то 14 март идома ёфта, ба он зиёда аз 100 адад техникаи зиреҳпӯш, авиатсия ва техникаи автомобилии муассисаҳои зиёди давлатии вилоят сафарбар шудаанд.
«Дар машқҳои низомӣ омӯзиш ва иҷрои амалиёти марбут ба ташкили мудофиаи қаламрав, сафарбарии сарбозону афсарони эҳтиётӣ анҷом дода шуда, тибқи фарзия, гурӯҳҳои мусаллаҳи террористии байнулмилалӣ марзи Тоҷикистон бо Афғонистонро убур мекунанд ва дар тамринҳо ҳолатҳои муҳосира ва аз байн бурдани ин гурӯҳҳои ба қаламрави кишвар воридшуда ба иҷро мерасад», – иброз дошт ӯ.
