Рӯзи 21 июн ҳайати тоҷирон ва намояндагони корхонаҳои бузурги Беларус ба Тоҷикистон ташриф меоранд.
Тавре маркази матбуоти Палатаи савдо ва саноати Тоҷикистон (ПСС ҶТ) дар ин робита хабар медиҳад, ҳайат аз намояндагони корхонаҳои истеҳсоли техникаи автомобилӣ, мебел, дорувории тиббӣ, маҳсулоти ғизойӣ барои кӯдакон, маҳсулоту лавозимот барои варзишгарон, молу воситаҳои ороишӣ ва воситахои техникаи маишӣ иборат хоҳад буд.
Ба иттилои манбаъ, ҳадаф аз сафар густариши бозорҳои фурӯши маҳсулоти корхонахои Беларус, дарёфти шарикони нави корӣ, роҳандозии шаклҳои гуногуни ҳамкории барои тарафайн судманд аст.
Гуфта мешавад, сафари ҳайати Беларус бо талошҳои муштараки сафорати Беларус дар Тоҷикистон, ПСС ҶТ ва шуъбаи ПСС Беларус дар Могилёв ташкил мешавад ва дар доираи сафар дар шаҳрҳои Хуҷанду Душанбе биржаи робита ва ҳамкории доираҳои тиҷоратии Тоҷикистону Беларус барпо мешавад.
Зимнан зикр мегардад, ки сафари ҳайати тоҷирони Беларус ба Тоҷикистон то санаи 26 июн идома меёбад.
