Бахшида ба истиқболи ҷашни Истиқлолияти Ҷумҳурии Тоҷикистон бо тасмими Иттифоқи ҳунармандони Тоҷикистон дар ҳамкорӣ бо ташкилоти байналмилалии ғайридавлатии CESVI, Ассотсиатсияи миллии соҳибкории хурд ва миёнаи ҶТ дар доираи Лоиҳаи «Ҳунармандӣ ва соҳибкорӣ ба воситаи ҳамгироии минтақавӣ ва савдои боадолат» бо маблагғузории Иттиҳоди Аврупо рузҳои 5-6- уми сентябри соли ҷорӣ Ярмаркаи маҳсулоти ҳунармандону косибон дар маркази Исмоилияи шаҳри Душанбе баргузор мешавад, ки дар он зиёда аз сад нафар ҳунармандону косибон иштирок хоҳанд кард.
Тавре аз намояндагии Иттиҳоди Аврупо дар ҶТ хабар доданд, дар давоми ду рӯз маҳсули офаридаи ҳунармандон аз манотиқи мухталифи кишвар аз қабили кандакорӣ, сабадбофӣ, гулдӯзи, сӯзанидӯзӣ, нақшофарӣ дар маҳсулоти саффолӣ, зару зевари заргарӣ ва либосҳои миллӣ бо шаклу қолаби замонавӣ, молҳои рӯзғордорӣ, маҳсулоти чармин, армуғонҳои гуногун ба маърази меҳмону ҳаводорони Ярмарка гузошта мешавад.
Рӯзи аввали чорабинӣ дар толори барҳавои маркази Исмоилия вохури дар мавзуи «Ҳунармандӣ ва сайёҳӣ: Фазои ягонаи ҳамкориҳои мутақобилаи самарабахш» баргузор мегардад, ки дар он масъалаҳои ҳамкориҳои дуҷонибаи ҳунармандон бо сохторҳои вобаста ба фаъолияти сайёҳӣ, ҷӯстуҷуи имкониятҳои ҷадид бо ҳадафи рушди ҳамкориҳои устувори ояндасоз матраҳ мегардад.
Иштирокчиён ва меҳмонони Ярмарка имконият доранд устоҳои чеҳрадасти Тоҷикистон Шахноза Камолова дар сабадбофӣ, Оина Шер дар муҳрадӯзӣ, Назира Хасанова- дар расмкашӣ, Умеди Корвон – дар ороиши нақшҳои гиребонӣ аз сангу муҳра, сӯзанаксозӣ, Сатторов Бобоҷон дар лухтаксозӣ, Александара Саревская дар армуғонофарӣ ба ҳайси коромӯз баргузории машғулиятҳои касбиро бар дӯш гирифтаанд.
Ҳамзамон барои иштирокчиён имконияти тамошои мӯди ҷомаву чапонҳои истеҳсоли Ikathouse ва Madynya collections фароҳам оварда шудааст. Ҳамчунин бо тасмими Ташкилоти Ҷамъиятии “Лигаи занҳои истеъдоди маҳдуддошта” намоиши муди либосҳо баргузор мешавад. Барномаҳои рақсии дастаҳои ҳунарии “Alegria”-и студияи рақсии “New Era”, дастаи рақсиву овозии «ВЭСТ» ба тантанаи ҳунар ҷолибияти дигаре хоҳанд бахшид.
Лоиҳа аз ҷониби Иттиҳоди Аврупо маблағгузорӣ шуда, бо тасмими Ташкилоти итилиявии CESVI дар Тоҷикистон ва Қирғизистон роҳандозӣ мешавад, ки он дар устувории ҳамкориҳои кишварҳои минтақаи Осиёи Марказӣ мусоидат намуда, дар рушди сохторҳои хусусие, ки дар соҳаи пешрафт ва эҳёи ҳунарҳои косибӣ фаъолият мекунанд, таъсири мусбӣ хоҳад гузошт.
Ташкилотчиёни ярмарка: Иттифоқи Ҳунармандони Тоҷикистон, Иттиҳоди Аврупо, Созмони итолиявии «Чезви», Ассотсиатсияи миллии соҳибкории хурд ва миёнаи ҶТ
Шарикони ярмарка: ҶДММ (ООО ТРК) «ВАТАН», Ташкилоти Ҷамъиятии «Alegria», Таджик мама, студияи барномаҳои рақсӣ «Новая Эра», дастаи рақсиву овозии «ВЭСТ», Маркази фарҳангии «Bactria», Клуби Хизматии Бишкек, ТҶ Рушти инклюзия, ТҶ Ирода, ТҶ СИДА, Маркази Исмоилия.
