Мақомоти шаҳрдории Душанбе барои варзишгарони бештар умедбахши пойтахт стипендияҳои махсус таъин кард.
Бино ба маълумоти
сомонаи расмии
мақомоти шаҳрдории пойтахт, дар қарори раиси шаҳри Душанбе дар ин робита зикр мегардад, ки қарори мазкур ба хотири дастгирӣ ва ҳавасмандгардонии варзишгарони беҳтарини шаҳри Душанбе ва баҳри инкишофи муттасили тарбияи ҷисмонӣ ва варзиш қабул мешавад.
Ба Сарраёсати молияи шаҳри Душанбе дастур дода шудааст, ки аз ҳисоби фонди захиравии раиси шаҳри Душанбе барои пардохти стипендияи мазкур 168 ҳазор сомонӣ маблағ ҷудо намояд. Стипендия ба варзишгарони бештар ба комёбиҳо ноилгардида дар мусобиқоти байнулмилалии соли гузашта дода мешавад.
Дар рӯйхати гирандагони стипендияи мақомоти шаҳрдории пойтахт 28 нафар варзишгарон ҳузур доранд, ки 16 нафарашон навъҳои олимпиро намояндагӣ карда, стипндияи дараҷаи аввалро мегиранд. Миёни онҳо муштзанон Шоира Зулқайнарова, Аҳмадҷон Саидов, Мавзуна Чориева, гурзандоз Дилшод Назаров, гуштигир Муҳаммадмурод Искандаров ва дигарон ҳузур доранд.
Ба стипендияи дараҷаи дуюм 12 нафар варзишгарон соҳиб мешаванд, ки аз навъҳои ғайриолимпӣ намояндагӣ мекунанд. Аз ҷумла, гуштигирони навъи самбо Зафар Алиев, Акмалиддин Каримов, Набимуҳаммад Хоркашев, Мустафо Ҳасанов, таэквондочиён Сабина Тюраева, Баҳромҷон Гадоев, Масрур Сатторов ва дигарон ба чунин стипендия сарфароз гардонида мешаванд.
