Баъди Яман Тоҷикистон дуюмин кумакгирандаи асосии Маркази дастгирӣ ва кумакҳои башардӯстонаи шоҳи Арабистони Саудӣ Салмон (KSRelief) мебошад.
“Арабистони Саудӣ ҳамеша ба кишварҳои ниёзманд бидуни ягон поймолкунии ҳуқуқ кумак мекунад”, – изҳор доштааст роҳбари KSRelief Абдулло ал-Робия.
Ӯ қайд кардааст, ки баъди Яман Тоҷикистон дуюмин кишвари бузурги кумакгирандаи шоҳи Арабистони Саудӣ мебошад, хабар додааст Arab News.
Ба гуфтаи Абдулло ал-Робия Марказ ба шаҳрвандони аз заминларза ва обхезӣ осебдидаи Тоҷикистон кумак карда, бо ҷамъияти Ҳилоли Аҳмари ҷумҳурӣ ва дигар мақомот барои амалисозии якчанд лоиҳаҳои муҳим ҳамкорӣ дошт.
Қобили зикр аст, ки ҳафтаи сипаришуда Маркази омӯзишиву методии Кумитаи ҳолатҳои фавқулодда, ки як ниҳоди тозатаъсиси омӯзишист, бо бинои нав ва муҷаҳҳаз таъмин гардид. Ин бино дар доираи ҳамкориҳои байналмилалии Кумита сохта шуд ва маблағгузори он Маркази дастгирии ёриҳои башардӯстонаи Шоҳ Салмони Арабистони Саудӣ буд.
Моҳи майи соли равон дар ҷараёни Форуми сармоягузории Тоҷикистону Арабистони Саудӣ дар Душанбе ва Хуҷанд ҷонибҳо дар бораи таҳкими ҳамкориҳои мутақобилан судманд дар соҳаи сармоягузорӣ ба созиш расиданд.
Аз рӯи натиҷаҳои гуфтушунид аз ҷониби бахши хусусии Тоҷикистон ба баррасии намояндагони Арабистони Саудӣ як қатор лоиҳаҳои сармоягузорӣ пешниҳод шуданд. Давоми солҳои 2007-2017 сармоягузорони Арабистони Саудӣ ба иқтисоди Тоҷикистон 160,2 млн. доллар маблағгузорӣ карданд, ки ҳамаи он ба қарзи ҷалбшудаи корхона ва ташкилотҳои ҷумҳурӣ рост меояд.
Тӯли 8 моҳи соли ҷорӣ муомилоти мол байни Тоҷикистон ва Арабистони Саудӣ ҳамагӣ 3 ҳазор долларро ташкил додааст, ки пурра ба содироти маҳсулот аз Тоҷикистон рост меояд. Соли гузашта муомилоти мол байни кишварҳо ба қайд гирифта нашудааст.
Соли 2016 ҳаҷми гардиши молу маҳсулот байни кишварҳо ба беш аз 173 ҳазор доллар баробар шуда, нисбат ба як соли пеш қариб 26 маротиба афзудааст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
