Ширкати “Барқи тоҷик” итминон медиҳад, ки баъзан вақт қатъ шудани интиқоли барқ ба корҳои санҷишу таъмир вобаста буда, дар Тоҷикистон реҷаи маҳдуди истифодаи барқ (лимит) ҷорӣ нашудааст.
Қобили зикр аст, ки беш аз 10 рӯз инҷониб дар минтақаҳои гуногуни Тоҷикистон интиқоли барқ қатъ мешавад: дар баъзе ҷойҳо аз соати 08:00 то 18:00, дар ҷойи дигар – аз 07:00 то 18:00 ва бархе шабона аз барқ маҳрум мешаванд. Дар маҳалҳо ин ҳолатро ба мардум шарҳ намедиҳанд.
“Обро сарфа мекунанд”
Энергетики тоҷик Камолиддин Сироҷиддинов ба шарҳу тавзеҳҳои “Барқи тоҷик” дар ин бора бовар надорад.
“Дар ширкат мегӯянд, ки корҳои санҷишу таъмир ҷараён дорад, лекин мушаххасан дар кадом зеристгоҳу хати интиқоли барқ, дар кадом минтақа гузаштани ин корҳоро номбар намекунанд.
Ба фикрам, да низоми энергеткии кишвар ҳамааш хуб аст, мушкил норасоии об мебошад. Моҳҳои охир дар Тоҷикистон боришот набуд, дар минтақаҳои баландкӯҳ барф меборад, ҳарорат сард буда, барф об намешавад ва дарёҳо камоб шуданд. Агар мо ҳозир обро аз обанбори Норак зиёд истифода барем, пас моҳҳои феврал-март он ба охир мерасад ва ба мушкилоти ҷиддӣ дучор хоҳем шуд”, – мегӯяд коршинос.
Ба гуфтаи ӯ, айни замон ҳадди ниҳоӣ се агрегати неругоҳи Норак кор карда, агрегатҳои боқимонда махсусан барои сарфаи об барои зимистон аз кор боздошта шудаанд.
“Ҳаҷми ҳадди ақали об, ки базӯр барои кори ду агрегати неругоҳи Роғун кифоя аст, баъдан дар ҳаҷми начандон зиёд ба обанбори Норак омада мерасад. Барои таъмини пурраи кишвар бо барқ кори 6-7 агрегати неругоҳи Норак лозим аст”, – шарҳ медиҳад Сироҷиддинов.
Ба бовари мутахассис, бо оғози боришот ва афзоиши ҳаҷми маҷрои об вазъ ба эътидол хоҳад омад.
“Айни замон ТАЛКО ҳаҷми ҳадди ақали барқро истифода мекунад. Он ҷо аксари электродҳо кор намекунанд, аз ин рӯ, барқ бояд барои ҳама кифоя бошад”, – қайд кард ӯ.
Пинҳон доштан чӣ лозим аст?
Ба ақидаи коршинос, амали ширкати “Барқи тоҷик”-ро аз як тараф дуруст ҳам арзёбӣ кардан лозим аст.
“Ҳозир нисбатан гарм буда, барои аҳолӣ осонтар аст. Агар моҳҳои январ-феврал ҳаво хунук шуда, об нашавад, он замон хеле душвор хоҳад шуд. Намефаҳмам, ки чаро онҳо инро намегӯянду шарҳ намедиҳанд?”, – савол медиҳад коршинос.
Ӯ хотиррасон намуд, ки ҳукумат як сол пеш дар бораи тадбирҳо дар давраи зимистони имсола қарор қабул кард. Тасмим гирифта шуд, ки ба мавсими зимистон бояд ҳамаҷониба омодагӣ гирифт, яъне дар ин давра низом бояд аллакай дар ҳолати коршоям қарор дошта бошад: “Аз ин рӯ, такрор мекунам, мутмаинам, ки сабаб мушкили камбуди об аст”.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
