Ширкати ҳавопаймоии “Северный ветер”-и Русия аз фурудгоҳи Колтсовои шаҳри Екатеринбург ба шаҳри Бохтар (собиқ Қӯрғонтеппа) парвозҳои мустақими доимӣ роҳандозӣ кард. Парвози аввал рӯзи 15 декабр ба нақша гирифта шудааст.
Парвозҳо рӯзи чоршанбеи ҳафта бо ҳавопаймои Boeing 737-800, ки ғунҷоишаш 189 нафар мусофир аст, анҷом дода мешаванд. Вақти парвоз 3 соату 25 дақиқа аст, хабар медиҳад дафтари матбуоти фурудгоҳи Колтсово.
Қаблан парвозҳо аз Екатеринбург ба Қӯрғонтеппа (Бохтар) соли 2014 аз ҷониби ширкати ҳавопаймоии East Air иҷро карда мешуданд.
Дар сомонаи ширкат арзиши билет аз Екатеринбург то Бохтар зикр шудааст. Ба парвози аввал он 10 ҳазору 154 рубл (1 ҳазору 555 сомонӣ) ва ба самти бозгашт – 15 ҳазор рубл (2 ҳазору 298 сомонӣ) нарх доранд.
Нархи чиптаҳо ба хатсайрҳои минбаъда аз 15 ҳазор рубл (2 ҳазору 298 сомонӣ) – Екатуринбург-Бохтар ва самти бозгашт аз 12 ҳазору 494 рубл (1 ҳазору 914 сомонӣ) оғоз мегардад.
Гуфта мешавад, имрӯз аз Колтсово боз бо се шаҳри Тоҷикистон – Хуҷанду Кӯлоб ва Душанбе хатсайри мустақими мусофирбари ҳавоӣ боз шудааст.
“Ҳамаи мусофирони ба Тоҷикистон воридшаванда бояд маълумотномаи ПСР бо натиҷаи манфии тест аз COVID-19 пешниҳод намоянд, ки на дертар аз 72 соат пеш аз убури сарҳад гирифта шуда бошад. Барои кӯдакони то сесола маълумотнома талаб намешавад”, – зикр мегардад дар хабар.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
