Пас аз шикояти сокини маҳаллаи 30-уми шаҳри Хуҷанд мақомоти ҳифзи муҳити зист фаъолияти буғхонаи корхонаи машруботи “Сайҳун”-ро боздошта, роҳбари онро ҷарима кардаанд.
Абдуаҳад Ҳакимзода, сардори Сарраёсати ҳифзи муҳити зисти вилояти Суғд, дирӯз, 24-уми январ, ба “Азия-Плюс” гуфт, “дар пайи шикояти сокинони маҳаллаи 30-юми шаҳри Хуҷанд оид ба ихроҷи зиёди моддаҳои ифлоскунанда ба ҳаво аз ҷониби корхонаи машруботи ҶДММ ЛВЗ “Сайҳун” мутахассисони соҳа ба ин корхона рафта, санҷиш гузарониданд ва маълум шуд, ки шикоятҳо асос доранд”.
Сокинон дар шикояти худ аз дуди ғализи ин корхона шикоят карда, аз мақомот хоста буданд, ки чораандешӣ карда шавад.
Абдуаҳад Ҳакимзода гуфт, санҷиши ҳавои атрофи корхона собит намуд, ки партови моддаҳои зарарнок аз меъёри муқарраргардида зиёд будааст.
Ҳамчунин, муайян гардидааст, ки муҳлати амали иҷозатномаи корхона барои ихроҷи партови моддаҳои зараровар ба ҳаво низ гузаштааст.
ИЗОБРАЖЕНИЕ
Бо назардошти меъёри зиёди партови моддаҳои зараррасон ва гузаштани муҳлати амали иҷозатнома барои ихроҷи партов бо қарори сардори Сарраёсати ҳифзи муҳити зист дар вилояти Суғд фаъолияти дегхонаи ҶДММ “Корхонаи машруботбарории Сайҳун” муваққатан боз дошта шудааст.
Ҳамчунин, барои бе иҷозат ва аз меъёр зиёд партофтани моддаҳои ифлоскунанда ба ҳаво ҶДММ ЛВЗ “Сайҳун” 1670 сомонӣ ҷарима гардидааст.
Фирӯз Қодиров, як масъули корхонаи “Сайҳун” имрӯз, 25-уми январ, дар сӯҳбат бо мо муваққатан бастани корхонаи истеҳсоли машруботро таъйид кард. Ӯ гуфт, ки “умед доранд пас аз бартараф кардани камбудиҳо коргоҳ фаъолияташро аз сари нав ба роҳ мемонад”.
Ёдовар мешавем, ки шикояти сокинон аз дуди корхонаи “Сайҳун” моҳи ноябри соли 2022 дар сомонаҳои иҷтимоӣ паҳн шуда буд. Онҳо аз мақомоти дахлдори шаҳр талаб мекарданд, ки ҷиҳати ислоҳи камбудиҳои ҷойдоштаи “Сайҳун” мусоидат намоянд. Зеро корхона ҳамагӣ 10-15 метр дуртар аз хонаҳои истиқоматӣ ҷойгир буда, дуди он боиси нороҳатии сокинон шудааст.
