Имсол Наврӯзи сатҳи ҷумҳуриявӣ дар шаҳри Хуҷанд таҷлил карда мешавад ва дар ин чорабинӣ ширкати раисиҷумҳури Тоҷикистон Эмомалӣ Раҳмон дар назар аст. Дар ин бора аз вазорати фарҳанги кишвар ба “Азия-Плюс” иттилоъ доданд.
Ба гуфтаи манбаъ, чорабинии тантанавӣ дар варзишгоҳи “20-солагии истиқлолият”-и шаҳри Хуҷанд баргузор шуда, иштироки зиёиён, фарҳангиён ва сарояндагони номдори тоҷик дар назар аст.
“Дар ҷашни Наврӯз ширкати меҳмонони хориҷӣ ҳам пешбинӣ шудааст. Дар вилояти Суғд кумитаи таҷлили ҷашни Наврӯз таъсис ёфтааст”, – гуфтанд дар вазорат.
Аммо дар Вазорати фарҳанг дақиқ нагуфтанд, ки Наврӯз дар шаҳри Хуҷанд кадом рӯз таҷлил карда мешавад.
Ба ифтихори ҷашни Наврӯз дар шаҳри Хуҷанд ва дигар шаҳру навоҳии вилояти Суғд мусобиқаи аспдавонӣ, бузкашӣ, ҷашнвораҳои “Сайри гули лола” ва “Маликаи баҳор” пешбинӣ шудааст.
Бояд гуфт, соли гузашта чорабиниҳои асосии ҷашни Наврӯз дар сатҳи ҷумҳуриявӣ дар ноҳияи Ҷалолиддини Балхии вилояти Хатлон баргузор шуда буд.
Ёдовар мешавем, ки Наврӯз аз ҷашнҳои қадимтарини мардуми ориёӣ маҳсуб ёфта, он соли 2010 аз ҷониби Созмони Милали Муттаҳид мақоми байналмилалиро гирифт.
