Дар додгоҳи ноҳияи Советскийи шаҳри Новосибирск рӯзи 4 март ҳукм аз рӯи парвандаи Хушнуд Ҳамроев аз Тоҷикистон эълон мешавад. Ӯ дар куштани духтари 17-сола аз Сибир, ки гумон дошт ба ӯ хиёнат кардааст, гунаҳкор дониста мешавад. Дар ин бора НГС бо истинод ба мақомоти прокуратураи вилояти Новосибирск хабар медиҳад.
Дар ҷараёни мурофиаи додгоҳӣ додситон барои Ҳамроев ҷазои 15 солу 6 моҳи зиндони низомаш шадид дархост намуд.
Ҳамроевро дар содир намудани якчанд ҷиноят бо шумули одамкушӣ, таҳдидҳо ба куштан, азобу уқбат додан ва алоқаи ҷинсӣ бо шахсе, ки ҳоло ба синни 16-солагӣ нарасидааст, муттаҳам мекунанд.
Дар хабар гуфта мешавад, дар мурофиа ӯ гуноҳашро дар куштор рад накарда, изҳор доштааст, ки духтар ба ӯ хиёнат кардааст.
Тавре ки қаблан зикр гардида буд, ин ҳодисаи фоҷеабор дар микрорайони Нижняя Елтсовка шаби 27 июли соли 2022 рух дода, он дар таҷҳизоти видео сабт шудааст.
Дар кадрҳои видео дида мешавад, ки духтар аз назди ҷавон гурехтанӣ шуда, лекин мард ӯро дарёб мекунад ва сипас ба замин афтонида, бо корд ба зарбазанӣ оғоз мекунад.
Ин ҳодиса дар назди ронандаи автомашина ва як шоҳиди дигар рух дода, лекин онҳо аз наздикшавӣ бо ҷинояткори мусаллаҳ ҳарос намудаанд. Пас аз куштани духтар ҷинояткор аз ҷойи ҳодиса фирор мекунад. Духатри ҷабрдида то омадани мошини ёрии таъҷилии тиббӣ ба ҳалокат мерасад.
Шиносҳои духтар ҳикоят кардаанд, ки қаблан онҳо тайи ду сол бо ҳам муносибат дошта, як ё ду моҳ пеш аз ҳам ҷудо шудаанд.
Ба ақидаи онҳо, сабаби даст ба куштор задани ҷавон рашк аст. Чанд рӯз пеш то ҳодиса ҷавон гуфта будааст, ки маъшуқаааш “ё аз они ӯ мемонад ё аз они ҳеҷ кас намешавад”.
