Аз Кумитаи дин, танзими анъана ва ҷашну маросим ба “Азия-Плюс” хабар доданд, ки шаҳрвандони ҳалокшуда сокинони шаҳрҳои Душанбе, Хуҷанд ва ноҳияи Фархор буда, ҷасади онҳо дар Арабистони Саудӣ ба хок супорида шуданд.
Аммо шахсияти нафарони ҷонбохта ва синну соли онҳо маълум нест ва аз Кумитаи дин, танзими анъана ва ҷашну маросим ҳам дар ин бора иттилоъ надоданд.
Қаблан “Франс-Пресс ” иттилоъ дода буд, ки дар маросими ҳаҷҷи фарзии имсола дар шаҳри Маккаи Арабистони Саудӣ беш аз 1000 кас ҷон бохтаанд. Вазорати тандурустии ин кишвар сабаби марги бештари зоиронро ба гармии беш аз 50 дараҷа рабт додааст.
Бояд зикр кард, ки соли ҷорӣ давлати Арабистони Саудӣ барои Тоҷикистон 7 ҳазор квота ҷудо кард.
Тибқи иттилои Кумитаи дин, танзими анъана ва ҷашну маросим аввалин гуруҳи зоирон 23-юми июн ба ватан бармегарданд.
