Душанбе. 24-уми феврал. ОИ «Азия-Плюс» – Сармутахассиси Маркази тадқиқоти стратегии назди президенти Тоҷикистон Фирӯз Саидов бар чунин назар аст, ки дар мулоқоти қарибулвуқӯъи сарони кишварҳои Русияву Тоҷикистон дар шаҳри Маскав оид ба масоили густариши минбаъдаи ҳамкориҳо дар соҳаи иқтисод, аз ҷумла иштироки Русия дар лоиҳаҳои гидроэнергетикӣ, истихроҷи гази табиӣ ва саноати кӯҳкорӣ тавофуқ ҳосил хоҳад шуд.
Дар мусоҳибаи ихтисосӣ Ф.Саидов ба хабарнигори ОИ «Азия-Плюс» изҳор дошт, ки мулоқоти мазкур идомаи мантиқии гуфтушуниди дуҷонибаи кишварҳо дар сатҳи олӣ мебошад, ки моҳи августи соли гузашта дар шаҳри Душанбе баргузор гашта буд. «Нофаҳмӣ миёни Тоҷикистону Ӯзбекистон оид ба масъалаи сохтмони иншооти гидроэнергетикӣ барои ба сардӣ гаравидани муносиботи Тоҷикистону Русия баҳона шуда наметавонад», – гуфт ӯ.
Ф.Саидов мегӯяд, Русия ҳамеша шарики стратегии Тоҷикистон боқӣ мемонад ва рӯи кор омадани баъзе нофаҳмиҳо миёни кишварҳо ва он ҳам бо иштироки ҷониби саввум, наметавонад ба рушди ҳамкории минбаъда халале ворид созад.
Коршинос аз нав барқарор гардидани гуфтушунид оид ба иштироки Русия дар идомаи сохтмони нерӯгоҳи Роғунро аз эҳтимол дур намедонад.
