Душанбе. 24-уми феврал. ОИ «Азия-Плюс» – Вазорати кишоварзии ҷумҳурӣ аз рӯзноманигорон даъват ба амал овард, ки ба дастгирии бахши кишоварзӣ камар баста, бо вазорат ҳамкории зич дошта бошанд.
Сухангӯи вазорат Нарзулло Додобоев изҳор дошт, ки вазорат ба вокуниш нисбати маводи таҳлиливу танқидӣ дар ВАО омода аст. Ба гуфтаи ӯ, вазири кишоварзӣ Қосим Қосимов зарур мешуморад, ки иштироки рӯзноманигорон дар ҳалли мушкилоти бахши кишоварзӣ ба фоидаи кор аст.
Дар асоси фармони президент «Дар бораи вокуниши шахсони мансабдор ба маводи таҳлиливу танқидӣ дар ВАО» вазири кишоварзии ҷумҳурӣ низ фармонеро ба имзо расонид, ки тибқи он тамоми воҳидҳои сохтории вазорат ӯҳдадор шуданд, оид ба маводи таҳлиливу танқидӣ дар ВАО вокуниш нишон дода, баҳри рафъи камбудиҳои зикршуда чораҳо андешанд ва дар ин бора ҳисобот пешниҳод намоянд.
Н.Додобоев мегӯяд, вазир зикр кардааст, ки вазорат васоити ахбори умумеро, ки бо вазорат ҳамкории пурсамарро ба роҳ мемонад, дастгирӣ хоҳад кард. «Дар навбати худ, бахши кишоварзӣ ба дастгирии ВАО ниёз дорад», – изҳор дошт Н.Додобоев.
