Хуҷанд. 19-уми феврал. ОИ «Азия-Плюс» – Дар вилояти Суғд ҳаҷми истихроҷи гази табиӣ коҳиш меёбад.
Тавре ба ОИ «Азия-Плюс» мудири шӯъбаи энергетика ва саноати ҳукумати вилоят Содиқ Рустамов хабар дод, дар муқоиса бо моҳи январи соли гузашта моҳи январи соли ҷорӣ ҳаҷми истихроҷи гази табиӣ ба андозаи 20 дарсад кам шудааст. Коршиносон бар ин назаранд, ки захираҳои газ коҳиш меёбанд ва коркарди конҳои нави истихроҷ зарур аст. Истеҳсоли нафт бошад, баръакс, 100 тонна зиёдтар шудааст.
Ба гуфтаи С.Рустамов, ҳарчанд дар вилоят моҳи январ ба иллати норасоии ашёи хом, кам шудани талабот ба маҳсулот ва бозистии мавсимӣ 78 корхонаи саноатӣ аз фаъолият бозмонда бошад ҳам, барои саноатчиён он моҳи бад набуд. «Моҳи январ дар вилоят ба маблағи 73,2 млн. сомонӣ маҳсулот истеҳсол гардидааст ва суръати афзоиш нисбат ба моҳи январи соли гузашта 111,3 дарсадро ташкил медиҳад», – афзуд ӯ.
