Додгоҳи шаҳри Маскав мудири як меҳмонхонаеро, ки дар он ду маҳкумшудаи асосии ҳамла ба толори консертии “Крокус сити ҳол” – Далерҷон Мирзоев ва Муҳаммадсобир Файзов муддате зиста будаанд, ба се соли зиндон маҳкум кардааст. Ин ду нафар низ моҳи марти имсол дар қатори 13 тани дигар ба ҳукми абад маҳкум шуданд.
Дар ин бора хабаргузории “РИА Новости” бо такя ба санад додгоҳ хабар медиҳад.
Ба иттилои манбаъ, мудири меҳмонхона ба ташкили будубоши ғайриқонунии шаҳрвандони хориҷӣ дар Русия гунаҳгор дониста шудааст.
“Ӯ бояд дар бораи омадани Мирзоев ва Файзов, ки иҷозаи иқомати муваққатӣ надоштанд, ба мақомот хабар медод”, – навиштааст манбаъ бо истинод ба санади додгоҳ.
Аз номи меҳмонхонаи мазкур ва мудири он, ки як зан будааст, ном бурда намешавад. Танҳо зикр мешавад, ки ӯ меҳмонхонаи хурдеро дар ошёнаи якуми як бинои панҷошёна мудирият мекард.
“Мирзоев ва Файзов ҳар рӯз меомаданд ва маблағи иқомат дар меҳмонхонаро нақдӣ ё бо корти бонкӣ пардохт мекарданд, шабро мегузарониданд, рӯзона тамоми васоили худро ҷамъ карда мерафтанду боз баргашта ҷойгир мешуданд”, – навиштааст суханони занро ин расона, ки дар санад зикр шуда будааст.
Манбаъ навиштааст, занро баъди ҳамла, фавран барои бозпурсӣ даъват кардаанд ва ӯ “гуноҳашро инкор накарда, дар додгоҳ изҳори пушаймонӣ кардааст”.
Ба қавли ин расона, мувофиқи ҳукми додгоҳ, мудири меҳмонхона барои ду сол аз машғул шудан ба хадамоти меҳмонхонадорӣ низ маҳрум шудааст.
Ёдрас мешавем, ки ҳамлаи террористӣ ба толори консертии “Крокус сити ҳолл” дар вилояти Маскав рӯзи 22-юми марти соли 2024 сурат гирифта, тибқи иттилои пешакӣ, аз 146 то 149 нафар ҳалок ва зиёда аз 550 нафар осеб дида буданд. Дар умум, дар доираи парвандаи ҳамла ба “Крокус” 15 тан барои ҳамеша зиндонӣ шуда, 4 нафари дигар аз 19 то 22 сол ба ҳабс маҳкум шуданд.
Додгоҳ ҳамчунин қарор кардааст, ки аз маҳкумшудаҳо ба фоидаи ҷабрдидаҳо 200 миллион рубл ситонида шавад.
Назари онҳо дар робита ба ҳукми додгоҳ ба расонаҳо дастрас нест. Наздикони бархеяшон дар суҳбат бо “Азия-Плюс” гуфтанд, ки бовар надоранд, онҳо даст ба чунин ҷинояте зада бошанд.
Чанде пеш Ёқубҷон (Яъқубҷон) Юсуфзода, шаҳрванди Тоҷикистон ва яке аз маҳкумшудаҳо ба ҳукми абад дар доираи парвандаи ҳамла ба толори “Крокус сити ҳолл”-и Маскав дар боздоштгоҳ ҷонбохта пайдо шуд. Мақомоти Русия гуфтанд, ӯ худкушӣ кард.
“Азия-Плюс” баъди содир шудани ҳукм бо наздикони чор маҳкумшудаи асосии ин ҳамлаи террористӣ, ки шаҳрвандони Тоҷикистон мебошанд, суҳбат кард. Суҳбат бо пайвандони маҳкумшудаҳои асосӣ ва бархе ҷузъиёти ҳодисаро аз забони онҳо баъди эълони ҳукм дар ин матлаби мо хонед: “Ҷуз Худо, ба дигаре умед надорем”. Вокуниши пайвандони 4 маҳкумшудаи асосии ҳамла ба “Крокус” ба ҳукми додгоҳ
