Ёқубҷон (Яъқубҷон) Юсуфзода, шаҳрванди Тоҷикистон ва яке аз маҳкумшудаҳо ба ҳукми абад дар доираи парвандаи ҳамла ба толори “Крокус сити ҳолл”-и Маскав дар боздоштгоҳ худкушӣ кардааст.
Дар ин бора хабаргузориҳои давлатии русии “ТАСС”, “РИА Новости” ва “РБК” шоми дирӯз, 6-уми апрел, бо такя ба Идораи зиндонҳои Русия гузориш дода, гуфтаанд, ки ин нафар Ёқубҷон Юсуфзодаи 37-сола аст. Тани беҷони ӯ аз ҳуҷраи боздоштгоҳ ёфт шудааст.
“6-уми апрел дар яке аз ҳуҷраҳои боздоштгоҳи муваққатии №1 маҳбусе, ки ба ҳабси якумрӣ маҳкум шуда буд, бе нишонаҳои ҳаёт ёфт шуд. ӯ худкушӣ кардааст. Ба ҷои ҳодиса фавран корманди тиббии муассиса ҳозир шуданд, чораҳои эҳёгарӣ гузаронида шудд, аммо онҳо натиҷаи мусбат надоданд”, — омадааст дар изҳороти ин ниҳод ба расонаҳо.
Ба гуфтаи Идораи зиндонҳои Русия, ҳодиса тавассути камераҳои назоратӣ ошкор шуда, ин ниҳод тафтиши ҳодисаро оғоз кардааст.
Ёқубҷон Юсуфзода шаҳрванди Тоҷикистон аст ва дар қатори 14 нафари дигар ба ҳабси абад маҳкум шуда буд. Кумитаи тафтишотии Русия иддао карда буд, ки Юсуфзода барои таъмини ҳамлаварон бо ҷойи зист “тавассути корти бонкӣ ба як шарикаш пул фиристодааст”. Ин ниҳод илова карда буд, ки як қисми пул баъд аз рух додани ҳодиса “ба ҳисоби яке аз ҳамлаварон гузаронда шудааст”.
Боз киҳо ба ҳукуми абад маҳкум шуда буданд?
Дар умум дар доираи парвандаи ҳамла ба “Крокус” 15 тан барои ҳамеша зиндонӣ шуда, 4 нафари дигар аз 19 то 22 сол ба ҳабс маҳкум шуданд. Додгоҳи низомие дар Маскав инҳоро ба ҳукми абад маҳкум кард:
- Далерҷон Мирзоев;
- Саидакрам Раҷабализода;
- Фаридуни Шамсидин;
- Муҳаммадсобир Файзов;
- Умедҷон Солиев;
- Мустақим Солиев;
- Шаҳромҷон Гадоев,
- Зубайдулло Исмоилов;
- Ҳусейн Ҳамидов;
- Муҳаммад Шарифзода;
- Ёкубҷон Юсуфзода;
- Лутфуллои Назримад;
- Ҷумахон Қурбонов;
- Ҳусен Медов;
- Ҷабраил Аушев.
Ба ғайр аз Медов ва Аушев, ки шаҳрвандони Ингушистон ҳастанд, дигар ҳама шаҳрванди Тоҷикистон мебошанд.
Ҳамчунин Алишер Қосимов, шаҳрванди Қирғизистон, соҳиби манзиле низ, ки ба гуфтаи тафтишот, “аз мақсади ба иҷора гирифтани манзил огоҳ будааст”, ба 22 солу 10 моҳ зиндонӣ шудааст ва хонаи ӯро мусодира кардаанд.
Ҳамчунин, Исроил, Диловар ва Аминҷон Исломовҳо, шаҳрвандони Тоҷикистон, се узви як оилае, ки гуфта мешавад, ҳамлагарон аз онҳо мошини “Рено” харида, бо он баъди ҷиноят фирор кардаанд, ба шарикӣ дар ҷиноят муттаҳам ва ба 22 солу 10 моҳ зиндон маҳкум шудаанд. Гарчанде чанд рӯз пеш аз ҳамла онҳо мошинро фурӯхта ва пас аз дидани мошин дар телевизион ба пулис муроҷиат карда будаанд.
Додгоҳ ҳамчунин қарор кардааст, ки аз маҳкумшудаҳо ба фоидаи ҷабрдидаҳо 200 миллион рубл ситонида шавад.
Назари онҳо дар робита ба ҳукми додгоҳ ба расонаҳо дастрас нест. Наздикони бархеяшон дар суҳбат бо “Азия-Плюс” гуфтанд, ки бовар надоранд, онҳо даст ба чунин ҷинояте зада бошанд.
Ёдрас мешавем, ки ҳамлаи террористӣ ба толори консертии “Крокус Сити Ҳолл” дар вилояти Маскав рӯзи 22-юми марти соли 2024 сурат гирифта, тибқи иттилои пешакӣ, 146 нафар ҳалок ва зиёда аз 550 нафар осеб дида буданд.
Қаблан, масъулияти ҳамла ба толори консертии “Крокус”-ро гурӯҳи ДОИШ-и Хуросон ба уҳда гирифта, онро “интиқом аз кофирон” хонда буд.
Дар бораи ҷузъиёти ҳодиса ва бо гузашти як сол чӣ тағйирот дар он сурат гирифт, дар ин пайванд хонед.
