Соли гузашта ҳаҷми гардиши савдо миёни Тоҷикистон ва Русия 2,4 миллиард долларро ташкил додааст. Се моҳи соли 2026 бошад ҳаҷми тиҷорат байни ин ду кишвар нисбат ба ҳамин давраи соли гузашта 2,2% афзудааст.
Ин нукта рӯзи 15-уми май дар мулоқоти роҳбарони Комиссияи байниҳукуматии ҳамкории иқтисодӣ байни Тоҷикистон ва Русия дар шаҳри Қозон садо дод. Дар он Қоҳир Расулзода, сарвазири Тоҷикистон ва Марат Хуснуллин, муовини раиси ҳукумати Русия иштирок доштанд.
Дар мулоқот, вазъи кунунӣ ва дурнамои ҳамкории байниҳукуматӣ дар соҳаҳои тиҷорат, сармоягузорӣ, бонкдорӣ, энерҷӣ, саноат, кишоварзӣ, маориф ва фарҳанг баррасӣ шудааст.
Ҷонибҳо гуфтаанд, нақшаи амал барои афзоиши ҳаҷми тиҷорат барои солҳои 2025-2030 босамар татбиқ хоҳад шуд.
Ҳамчунин Тоҷикистону Русия омодагии худро барои боз ҳам густариш додани ҳамкорӣ ва истифодаи дурусти имкону захираҳои мавҷуда таъкид кардаанд.
Низоми бераводид бо беш аз 100 кишвар
Қоҳир Расулзода зимни суханронӣ дар ҳамоиши байналмилалии иқтисодӣ – “Русия – ҷаҳони ислом: Қазонфорум” сайёҳиро яке аз самтҳои асосии иқтисоди Тоҷикистон ном бурдааст.
Ба қавли ӯ, давоми соли 2025 вуруди сайёҳон ба Тоҷикистон 20% афзудааст.
Ӯ Русияро шарики боэътимоди стратегии Тоҷикистон номида, рушди ҳамкориҳоро таъкид намудааст.
Сарвазири кишвар ҳамчунин гуфтааст, “афзоиши маҷмуи маҳсулоти дохилии Тоҷикистон то охири соли 2025 дар сатҳи бештар аз 8 фоиз нигоҳ дошта шуд”.
“Дар доираи татбиқи Стратегияи миллии рушд то соли 2030, Тоҷикистон истиқлолияти энергетикии худро ба таври назаррас тақвият дода, суръати саноатикунониро тезонд”, – таъкид доштааст ӯ.
Ӯ ҳамчунин гуфтааст, ки Тоҷикистон дар оянда низ бо Русия, аз ҷумла бо Тотористон ҳамкориро дар соҳаҳои мошинсозӣ, нафту кимиё ва рақамикунонӣ тақвият медиҳад.
