Душанбе. 27-уми апрел. ОИ «Азия-Плюс» – Ҳизби демократии Тоҷикистон (ҷиноҳи М.Искандаров) ба мақомоти раҳбарии ҷумҳурӣ пешниҳод месозад, ки дар шароити бӯҳрони молӣ асноди меъёрии қонунгузории зиддибӯҳронӣ таҳия сохта, ҳукумати зиддибӯҳронӣ ташкил намояд.
Чӣ тавре ки дар барномаи зиддибӯҳронии ҲДТ қайд карда мешавад, дар давраи бӯҳрон бояд як силсила қонунҳо дар бораи чораҳои зиддиӯҳронӣ қабул карда шаванд, ки бояд аз қонунҳои қаблан ба тасвиб расида афзалият дошта бошанд. ҲДТ ба ҳукумати кишвар тавсия медиҳад, ки аз ҳисоби коршиносони салоҳиятдори соҳаи ҳуқуқшиносӣ гурӯҳи корие таъсис дода шавад, то ба қабули қонунҳои саҳеҳ мусоидат карда шуда, ин қонунҳо бояд ташкили ҳукумати зиддибӯҳрониро пешбинӣ кунанд. «Чунин ҳукумат бояд бо маслиҳату розигии ҳамаи шохаҳои ҳокимият ва ҳамчунин аҳзоби сиёсӣ, ТҒД, иттифоқҳои касаба ва иттиходияву созмонҳои ҷамъиятӣ ташкил гардад», – гуфта мешавад дар барномаи зиддибӯҳронии ҲДТ.
Дар барнома ҳамчунин зикр мегардад, ки ҳукумати зиддибӯҳронӣ танҳо дар давраи бӯҳрон амал хоҳад кард ва ба он баҳри танзими иқтисод, воситаҳои молиявӣ, истифодаи фишангҳои иқтисодӣ дар ҳолатҳои зарурӣ ва ғайра мебояд ваколатҳои фавқулоддаву махсус дод. «Ҳукумати зиддибӯҳронӣ ҳамчунин бояд шаффофияти иттилоот дар бораи вазъи воқеии иқтисодиву иҷтимоии ҷумҳуриро таъмин созад», – омадааст дар барномаи зиддибӯҳронии ҲДТ.
