Душанбе. 8-уми январ. ОИ «Азия-Плюс» – Дар нимаи дуюми соли ҷорӣ Чехия дар Тоҷикистон намоишгоҳи сайёр доир карданист.
Тавре аз Палатаи савдо ва саноати Тоҷикистон ба ОИ «Азия-Плюс» хабар доданд, имрӯз зимни мулоқоти муовини раиси палата Асаналӣ Карамалиев бо сардори шӯъбаи масоили иқтисодии сафорати Чехия дар Ӯзбекистон ва Тоҷикистон Петр Шада масъалаи мазкур ва дигар масъалаҳои ҳамкории дуҷонибаи кишварҳо мавриди баррасӣ қарор гирифтанд.
Ба иттилои манбаъ, Карамалиев ҷиҳати дастгирии баргузории намоишгоҳ омодагии ҷониби Тоҷикистонро изҳор намудааст. Дар ҷараёни мулоқот зикр гардид, ки роҳандозии ҳамкориҳо натанҳо дар соҳаи саноат, балки дар бахши сайёҳӣ низ имконпазир аст.
Ғайр аз ин ҷониби Тоҷикистон изҳор доштааст, ки бо назардошти натиҷаҳои намоишгоҳи доиргашта дар солҳои 2004 ва 2007, корхонаҳои ҶС «Текстил», ҶС «Нафиса», корхонаи қаннодии «Ширин» ва комбинатҳои истеҳсоли маҳсулоти ширӣ, ки бо техникаи Чехия кор мекунанд, ба таҷдиди истеҳсолоти худ тавассути техникаи ин кишвар таваҷҷӯҳ зоҳир сохтаанд.
