Ин қарор аз сӯи директори Маркази назорати давлатии беҳдоштию ҳамагиршиносӣ (эпидемиологи) -и вилояти Суғд имрӯз, 1-уми май содир шуд ва тибқи он фурӯши чанд маҳсулот, ки тез вайрон мешаванд, “дар ҷойҳои номувофиқ” манъ аст.
Дар ин бора аз ин марказ ба “Азия-Плюс” хабар дода, зикр кардаанд, ки бо фарорасии фасли гармо талаботи аҳолӣ ба истеъмоли нӯшокиҳои ташнашикан, яхмос, сихкабоби қиммагӣ, маҳсулоти қаннодии кремдор, хӯришҳои худсохти хонагӣ, консерваҳои хонагӣ, каллаю почаи яхкардашуда, оби ҷав ва дигар маҳсулоти хӯрока зиёд мешавад.
Ин қарор дар заминаи қарори сардухтури вилоятӣ дар робита ба манъи фурӯши бархе маҳсулот дар ҷойҳои номувоифқ ба тасвиб расидааст.
Ба иттилои манбаъ, ба рӯйхати маҳсулоти тезвайроншаванда ин маводҳо шомил мешаванд:
– хӯришҳои тайёршудаи хонагӣ, консерваҳои худсохт, маҳсулоти гӯштӣ, тухм, маҳсулоти ширӣ;
– маҳсулоти қаннодӣ, моҳӣ ва дигар намудҳои маҳсулоти зудвайроншаванда, дар кӯчаҳо, роҳравҳо ва ҷойҳои бе шароити яхдон нигоҳдорӣ қатъиян манъ карда шуд.
Ба таъкиди манбаъ, фурӯши ин маҳсулот дар зери офтоб ва бе хулосаи беҳдоштӣ ба бемориҳои шадиди меъдаю руда ва дигар омилҳои ба саломатӣ таъсиррасонанда оварда мерасонад.
“Мақсади асосӣ, пешгирии бемориҳои шадиди маъдаю рӯда, омилҳои ба он мусоидаткунанда инчунин, гузаронидани корҳои пешгирикунанда мебошад”,- гуфта мешавад дар қарор.
Дар матни қарор таъкид мешавад, ки он барои иҷро ба бозорҳои шаҳру навоҳии вилоят, муассисаҳои хӯроки умум, савдо, саноат, инчунин сехҳои қаннодӣ фиристода шуда, аз масъулини Раёсати ВКД дар вилояти Суғд ва додситонии вилоят назорати иҷрои он дархост шудааст.
Бояд гуфт, ҳамасола бо шуруъи фасли гармо, Хадамоти беҳдоштӣ ва ниҳодҳои зертобеи он дар минтақаҳо, фурӯши чанд маҳсулоте, ки тез вайрон мешаванд дар ҷойҳои номувофиқ манъ мекунанд. Вале на ҳамеша ин тастур аз сӯи соҳибкророн риоя мешавад.
