Душанбе. 3-юми декабр. ОИ «Азия-Плюс» – Рӯзҳои 11-12-уми декабр дар шаҳри Душанбе дар мавзӯъҳои «Муколамаи байнисоҳавӣ оид ба об дар Осиёи Марказӣ» ва «Муколамаи миллӣ оид ба ташаббуси Осиёи Марказӣ» семинар доир мегардад.
Тавре аз Вазорати мелиоратсия ва захираҳои оби ҷумҳурӣ ба ОИ «Азия-Плюс» хабар доданд, дар семинар иштироки кормандони мақомоти дахлдори кишварҳои минтақа, намояндагони ташкилотҳои ҷамъиятии экологӣ ва созмонҳои байнулмилалӣ оид ба ҳалли масоили оби минтақа дар назар аст.
Дар семинар баррасии масоили мушкилоти истифодаи захираҳои обии минтақаи Осиёи Марказӣ, дастрасӣ ба оби тоза нӯшокӣ ва беҳбуди вазъи санитариву экологии истифодаи об барои аҳолӣ ба нақша гирифта шудааст.
