Душанбе. 1-уми декабр. ОИ «Азия-Плюс» – Бар асари сӯхторе, ки шаби 29 ба 30-уми ноябр дар яке аз анборҳои воқеъ дар кӯчаи Пирогови шаҳри Душанбе ба амал омад, маҳсулоти қолинӣ тақрибан ба маблағи 2 млн. доллари амрикоӣ сӯхта нобуд гардид.
Тавре аз Сарраёсати давлатии хадамоти оташнишонии Вазорати умури дохилӣ ба ОИ «Азия-Плюс» хабар доданд, сӯхтор масоҳати 400 метри мураббаъро фаро гирифта, дар хомӯш кардани он 6 гурӯҳи оташнишонӣ ва 37 нафар кормандони хадамот иштирок кардаанд. «Оташ дар зарфи як соат хомӯш карда шуд ва хушбахтона, талафоти ҷ
онӣ ва ё ҷароҳати ҷисмонӣ бардоштани касе ба қайд гирифта нашудааст», – гуфт манбаъ.
Бино ба иттилои манбаъ, феълан сабабҳои сар задани сӯхтор омӯхта мешаванд. «Тамоми маҳсулоти нобудгардида ба тоҷири эронӣ – Муҳаммади Хоксор тааллуқ дошт», – афзуд сарчашма.
Тибқи маълумоти раёсат, ҳафтаи сипаригашта дар ҷумҳурӣ 29 ҳодисаи сӯхтор ба вуқӯъ пайваста, хисороти молии он беш аз 6 млн. сомониро ташкил додааст. Дар аксари маворид ба сар задани сӯхтор шӯхиҳои кӯдакон, муносибати беэҳтиётона бо оташ, риоя накардани қоидаҳои зиддисӯхтор ва расиши кӯтоҳи ноқилҳо сабаб мешаванд.
