Шурӯъ аз 1-уми июл фурудгоҳи шаҳри Қӯрғонтеппа аз фаъолият бозмонда, қабули ҳавопаймоҳоро қатъ кард.
Тавре ба ОИ «Азия-Плюс» муовини сардори фурудгоҳ Хушвақт Сафаров хабар дод, фаъолияти фурудгоҳ ба иллати оғози корҳои таъмири хатти парвоз, ки муддати 30 сол рӯйи таъмирро надидааст, қатъ шудааст.
Сармуҳосиби фурудгоҳ Соҳибҷон Абдурасулов мегӯяд, мутобиқи лоиҳа, маблағи умумии хароҷоти корҳои азнавсозии пурраи фурудгоҳ 55 млн. доллар ИМА-ро ташкил медиҳанд.
«Айни замон танҳо барои таъмири хатти парвоз ширкати ҳавопаймоии «Тоҷик Эйр» ба мо 10 млн. сомонӣ маблағ ҷудо кард, – гуфт ӯ. – Мо дар ин хусус ба ҳукумат муроҷиат кардем, вале аз ҳукумат посух гуфтанд, ки ба маблағгузорӣ барои ин корҳо танҳо дар соли 2015 имкон пайдо мешавад».
Абдурасулов гуфт, чанде аз соҳибкорони маҳаллӣ изҳор кардаанд, ки барои кӯмак дар азнавсозии толори пазироии фурудгоҳ омодаанд.
Сармуҳосиб изҳор кард, ки аз 1-уми июл ширкати ҳамкори фурудгоҳ «Мутриба» аз анҷом додани парвозҳо даст кашид ва ин ҳам яке аз сабабҳои қатъи фаъолияти фурудгоҳ мебошад. «Агар ширкатҳое пайдо шаванд, ки парвози ҳавопаймоҳоро ба фурудгоҳи мо таъмин карда тавонанд, мо ба қабули ҳавопаймоҳо омода буда, метавонем корро идома диҳем», – гуфт ӯ.
Ба қавли Абдурасулов, феълан фурудгоҳи Қӯрғонтеппа ба қабули ҳавопаймоҳои навъи миёна ба монади Боинг-500 қодир аст. «Масофаи хатти парвози фурудгоҳ 2 километру 485 метрро ташкил медиҳад ва мо ният дорем, ки онро то 3 километр дароз кунем, то ки дигар навъҳои ҳавопаймоҳоро ҳам қабул намоем», – гуфт сармуҳосиб.
Абдурасулов ҳамчунин зикр кард, ки дар робита ба қатъи фаъолият, аз 172 мутахассиси фурудгоҳ беш аз 60 нафарашон ба рухсатии бемузд фиристода шуданд.
