Душанбе. 1-уми ноябр. ОИ «Азия-Плюс» – Интиқоли нерӯи барқи Туркманистон ба ҷумҳурӣ шурӯъ шуд. Аз ширкати «Барқи тоҷик» ба ОИ «Азия-Плюс» хабар доданд, ки баъд аз нимашаби гузашта интиқоли он оғоз шудааст.
Қобили зикр аст, ки тибқи созишномаи соли 2007 миёни Туркманистону Тоҷикистон,
кишвари ҳамсоя бояд то соли 2012 ба Тоҷикистон ҳамасола дар давраи тирамоҳу зимистон дар ҳаҷми 1,2 млрд. кВт/соат нерӯи барқ интиқол диҳад.
Ёдрас мекунем, ки дар нишастҳои ИДМ ва ЕврАзЭС дар Бишкек сарони давлатҳои Тоҷикистону Ӯзбекистон ҷиҳати интиқоли нерӯи барқи Туркманистон ба кишвари мо тариқи шабакаҳои барқи Ӯзбекистон мувофиқа ҳосил карданд. 18-уми октяр дар мулоқоти Алмаато дар ин хусус тавофуқи ниҳоӣ ҳосил гардид.
Ба гуфтаи раиси ширкати «Барқи тоҷик» Шарифхон Самиев, аз 1-уми ноябр то 31-уми декабри соли ҷорӣ бо арзиши 3 сент барои 1кВт/соат ба Тоҷикистон 400 млн.кВт/соат нерӯи барқи Туркманистон интиқол дода мешавад ва интиқоли ҳаҷми боқимонда соли оянда амалӣ мегардад. «Барои транзити интиқоли нерӯи барқ мо ба ҷониби Ӯзбекистон 0,3 сент маблағ пардохт мекунем», – гуфт Ш.Самиев.
