Додгоҳи ноҳияи Шаҳритӯси вилояти Хатлон як донишҷӯи курси 1-уми Колеҷи омӯзгории ин ноҳияро бо ҷурми “паҳн кардани адабиёти динӣ ва маводи дорои таълимоти динидошта” 5 ҳазору 460 сомонӣ ҷарима кардааст.
Дар ин бора намояндаи Додгоҳи ноҳияи Шаҳритӯс имрӯз, 15-уми май ба “Азия-Плюс” иттилоъ дод.
Дар ҳукми додгоҳ, ки рӯзи 4-уми майи содир шудааст, аз донишҷӯ Азизбек Узоков, сокини 25-солаи деҳаи Чоршанбеи ноҳияи Шаҳритӯс ном бурда мешавад.
Ба иттилои мақомот, маҳкумшуда “адабиёти динӣ ва дигар маводи дорои хусусияти диниро бидуни гирифтани хулосаи ташхиси давлатии диншиносӣ паҳн кардааст”.
Додрас ин донишҷӯро “барои истеҳсол, содирот, воридот, фурӯш ва паҳн кардани адабиёти динӣ ва маводи дорои таъйиноти динӣ бидуни гирифтани хулосаи ташхиси давлатии диншиносӣ” гунаҳкор ва бар асоси моддаи 474 иловаи 1 қисми 1-и КҲМ муҷрим шинохта, 5 ҳазору 460 сомонӣ (70 нишондиҳанда барои ҳисобҳо) ҷарима бастааст.
Назари ин ҷавон дар робита ба ин гуфтаҳо ва ҳукми додгоҳ маълум нест.
Қаблан низ додгоҳҳои Тоҷикистон аз муҷозоти сокинони кишвар барои таълими динӣ дар шабакаҳои иҷтимоӣ ва паҳн кардани адабиёти динӣ гузориш дода буданд. Аз ҷумла, ахиран Додгоҳи шаҳри Исфара як ҷавони 21-соларо бо ҷурми “ғайриқонунӣ ба роҳ мондани таълими динӣ” дар шабакаҳои иҷтимоӣ 7 ҳазору 20 сомонӣ ҷарима баст.
Ин дар ҳолест, ки ҳоло дар Тоҷикистон танҳо дар Донишкадаи исломӣ метавон таҳсили динӣ кард ва барои таҳсили ғайрирасмӣ муҷозот пешбинӣ шудааст.
Ҳамчунин, сокинон барои воридот ва паҳни китобҳои динӣ бояд аз Кумитаи дин иҷозат гиранд ва адабиёти диниро аз ташхиси диншиносӣ гузаронанд.
