Ҳукумати Тоҷикистон Нақшаи амали рақамисозии бойгониҳои мақомоти давлатӣ барои солҳои 2026-2030-ро тасдиқ кардааст. Қарори марбута дар ин бораро Эмомалӣ Раҳмон, раисҷумҳури Тоҷикистон рӯзи 26-уми апрели соли 2026 ба имзо расонид.
Дар қарор зикр мешавад, ки ҳадафи асосии он, ба шакли электронӣ гузаронидани бойгониҳои мақомоти давлатӣ ва ба низоми хидматрасониҳои давлатӣ пайваст кардани маълумоти рақамии бойгониҳо мебошад.
Дар назар аст, ки то 2030 ҳамаи бойгониҳои давлатӣ, ба истиснои ҳуҷҷатҳое, ки сирри давлатӣ доранд, бояд ба тарзи электронӣ гузаронида шаванд. Барои татбиқи қарор 136,8 млн сомонӣ ба нақша гирифта шудааст.
Барои ин, мақомот таъсиси комиссияи давлатии рақамисозии бойгониҳо, тасдиқи меъёрҳои рақамисозии ҳуҷҷатҳои бойгонӣ, таҳияи талабот ба нусхаҳои рақамӣ ва маълумот (додаҳо), инчунин, ҷорисозии ягонаи барномавиро барои низоми бойгонии рақамӣ дар нақша доранд. Соли равон барӯйхатгирии бойгониҳои мақомоти марказӣ ва маҳаллӣ, таҳияи шиносномаҳои фондҳои бойгонӣ ва Рӯйхати ягонаи бойгониҳои рақамӣ, ки зимни хидматрасонии давлатӣ истифода мебаранд, пешбинӣ шудааст.
Дар соли 2027 маълумоти рақамии бойгонӣ бояд ба портали ягонаи хадамоти давлатӣ – khizmat.ehukumat.tj пайваст шаванд. Ҳамчунин ҷорисозии низоми ҳатмии бақайдгирии худкори ҳамаи амалҳои корбарон зимни кор бо бойгониҳои рақамӣ дар назар аст.
Ғайр аз ин, рақамисозии бойгониҳо дар соҳаи моликияти зеҳнӣ, омӯзиши кормандони бойгониҳо бо технологияҳои рақамӣ ва арзёбии мунтазами дастрасӣ ба маълумоти бойгонии рақамӣ ба нақша гирифта шудааст.
Назорати нақшаамали қарор ба дӯши Оҷонсии навоварӣ ва фанновариҳои рақамии Тоҷикистон вогузор шудааст. Вазорату идораҳо, ва ҳукуматҳои маҳаллӣ масъул шудаанд, ки нақшаҳои дохилиидоравии корҳоро барои ҳар сол таҳия ва тасдиқ карда, дар бораи иҷрои он ҳамасола то 15-уми январ ба оҷонсӣ маълумот пешниҳод кунанд.
