Рӯзи 14-уми май дар саҳни Мактаби рассомии бачагонаи шаҳри Душанбе ба муносибати Рӯзи байналмилалии поси хотираи шахсони фавтида аз бемории пайдошудаи норасоии масъуният (БПНМ) ҳамоиши фарҳангиву маърифатӣ баргузор гардид.
Ин чорабинӣ бо ташаббуси Ташкилоти ҷамъиятии ҷумҳуриявии “Шабакаи тоҷикистонии занони мубталои ВНМО” дар ҳамкорӣ бо мактабҳои рассомӣ ва мусиқии бачагонаи пойтахт зери унвони “Ҷаҳони бидуни марз, тамғагузорӣ ва табъиз” доир гардид.
Майдони баргузории чорабинӣ бо рамзи лентаи сурх ва асарҳои эҷодии наврасон оро ёфта, фазои ҳамбастагиву умедро таҷассум мекард.
Таҳмина Ҳайдарова, роҳбари “Шабакаи тоҷикистонии занони мубталои ВНМО” гуфт, ки ҳамасола дар якшанбеи сеюми моҳи май Рӯзи байналмилалии поси хотираи шахсони фавтида аз БПНМ (СПИД) ба ёд оварда мешавад.
“Ҳадафи асосии ин рӯз – арҷгузорӣ ба хотираи шахсони фавтида, дастгирии шахсони бо ВНМО зиндагӣкунанда ва ҷалби таваҷҷуҳи ҷомеа ба масъалаҳои тамғагузорӣ, табъиз ва роҳҳои пешгирӣ мебошад. Ин рӯз на танҳо барои андӯҳ, балки барои таҷдиди назар ба муносибати ҷомеа нисбат ба инсонҳост”, – гуфт ӯ.
Ҳайдарова таъкид кард, ки тамғагузорӣ ва табъиз нисбат ба шахсони бо ВНМО зиндагикунанда аксар вақт аз худи беморӣ дардноктар аст ва боиси ҷудоии инсонҳо аз ҷомеа ва наздикон мегардад.
Дар рафти ҳамоиш маълумоти муҳим вобаста ба ВНМО ба иштирокчиёни ҷамъомад расонида шуд. Зикр гардид, ки ин вирус тавассути дӯстӣ, оғӯш гирифтан ё суҳбат сироят намекунад. Барои баланд бардоштани маърифати ширкаткунандагон саҳначаҳои тарбиявӣ ва саволу ҷавоб ташкил гардиданд.
Қисмати хотирмони чорабинӣ, қадрдонии ғолибони озмуни расми беҳтарин буд, ки эҳсосоти худро дар рӯи коғаз тасвир кардаанд. Байни 12–18 солаҳо Беҳзод Замонов ва дар байни 6–11 – солаҳо Марям Тоатова сазовори ҷойи якум гардиданд. Инчунин, Ҳадиятулло Нуров, Амина Раҷабова ва дигар иштирокчиёни фаъол бо диплом ва тӯҳфаҳо сарфароз гаштанд.
Ҳамоиш бо лаҳзаи сукут ба хотири эҳтиром ва поси хотири шахсони фавтида аз БПНМ анҷом ёфт.
