Душанбе. 22-уми август. ОИ «Азия-Плюс» – Шоми 25-уми августи соли равон дар шаҳри Душанбе маросими расмии ифтитоҳи «Боғи устод Рӯдакӣ» доир мегардад.
Сухангӯи раиси шаҳр Шавкат Саидов ба ОИ «Азия-Плюс» хабар дод, ки дар маросими ифтитоҳ ширкати сарвари давлат Эмомалӣ Раҳмон, аъзои ҳукумати ҷумҳурӣ, вакилони мардумӣ, мақомоти шаҳрдории пойтахт ва намояндагони корпусҳои дипломатии муқими Тоҷикистон дар назар аст.
«Барои таҷдиду бозсозии боғ, ки қаблан боғи марказии истироҳату фароғат ном дошт, 17 миллион сомонӣ маблағ хароҷот карда шудааст», – гуфт ӯ.
Ба қавли Ш.Саидов, дар як вақт ҳамчунин ифтитоҳи маҷмааи ёдбуди асосгузори адабиёти классикии форсу тоҷик Абӯабдулло Рӯдакӣ низ доир мегардад. Ёдрас мекунем, ки корҳои сохтмонии таҷдиди боғи мазкур моҳи ноябри соли гузашта шурӯъ шуда буданд.
