Душанбе. 22-уми август. ОИ «Азия-Плюс» – Ҳафтаи оянда деҳқонони вилояти Хатлон ният доранд, дар пойтахт намоишгоҳи маҳсулоти кишоварзӣ барпо намоянд.
Аз Вазорати кишоварзии ҷумҳурӣ ба мухбири ОИ «Азия-Плюс» хабар доданд, ки рӯзҳои 15-16-уми август деҳқонони вилояти Суғд дар шаҳри Душанбе беш аз 130 тонна маҳсулоти кишоварзӣ фурӯхтанд. Дар намоишгоҳи кишоварзони вилояти Суғд дар бозори Қарияи Боло ба харидорон анвоъи сабзавот, орд, гӯшт, биринҷ пешкаш гардиданд, ки нархи маҳсулот нисбат ба бозорҳои шаҳр ба андоза 30-40 фоиз арзонтар буд.
Қобили зикр аст, ки чанде қабл деҳқонони ноҳияи Ваҳдат дар 14 маҳаллаи пойтахт ва бозорҳои «Шоҳмансур ва «Баракат» 384 тонна маҳсулоти кишоварзиро ба фурӯш бароварда буданд.
