Душанбе. 3-юми октябр. ОИ «Азия-Плюс» – Рӯзҳои 21-ум ва 22-уми октябри соли равон дар Душанбе бахшида ба проблемаҳои сарҳад ва тақвияти мубориза ба муқобили маводи нашъадор дар Осиёи Марказӣ конфронс баргузор мегардад. Тавре ба ОИ «Азия-Плюс» роҳбари департаменти иттилооти Вазорати умури хориҷии Тоҷикистон Давлат Назрӣ хабар дод, конфронс аз ҷониби Агентии назорати маводи нашъаовари назди президенти Тоҷикистон, Иттиҳоди Аврупо, Созмони амният ва ҳамкории Аврупо ва сохтори Созмони Милали Муттаҳид оид ба мубориза бар зидди маводи нашъаовар созмон дода шудааст.
Ба қавли Д.Назрӣ, дар кори конфронс намояндагони мақомоти дахлдори кишварҳои Иттиҳоди Аврупо, минтақаи Осиёи Марказӣ, Эрон, Афғонистон, Чин, Русия, Амрико ва Ҷопон ширкат хоҳанд варзид.
